एनआरएन इमर्जिंग नेपाल फण्डमा लगानीका लागि आव्हान

Globe Nepal
Globe Nepal 29 दिन अगाडी

अमेरिका,डिसेम्वर २२।  एनआरएनएले आफ्ना सबै सदस्यहरुलाई आफ्नो महत्वकांक्षी योजना इमर्जिंग नेपाल फण्डमा लगानीका लागि आग्रह गरेको छ। अध्यक्ष कुमार पन्तले आफ्नो नेतृत्व दावी गर्दैगर्दा लगानीका लागि यस्तो कोषको गठन गरिने एजेन्डा अघि सारेका थिए। सोही अनुसार अहिले यस्तो कोष निर्माणका लागि एनआरएन नेतृत्वले गैर आवासीय नेपालीहरुलाई लगानीका लागि आग्रह गरेको हो। 
यो कोष दश अरब रुपैंयाको हुनेछ। कोषमा एक जनाले न्यूनतम पचास लाख र अधिकतम पाँच करोड रुपैंया लगानी गर्न सक्नेछन्। नेपालमा कम्पनी दर्ता गरी यो कोषमा रकम संकलन गरिनेछ। अहिले कम्पनी दर्ताका लागि एनआरएनले सबै प्रशासनिक र कानुनी प्रक्रिया अगाडी बढाएको छ। त्यसका लागि एक अरब पचास करोड रुपैंयाको श्रोत (प्रतिवद्धता) एनआरएनले देखाउनुपर्नेछ। कम्पनी दर्ताका लागि आवश्यक पर्ने पुँजी रकम संकलन जारी रहेको र हालसम्म एक अरबभन्दा बढी रकमको प्रतिवद्धता प्राप्त भैसकेको एनआरएनएका अध्यक्ष कुमार पन्तले जानकारी दिएका छन्। यसरी प्रारम्भिक चरणमा लगानीका लागि प्रतिवद्धता जाहेर गर्नेहरुमा एनआरएनका संस्थापकहरु,पूर्व र वर्तमान नेतृत्वतहका व्यक्तिहरु छन्। 'यो गैर आवासीय नेपालीहरुको संगठित लगानीका लागि तयार गरिएको प्रोजेक्ट हो जसलाई म मास्टर प्रोजेक्ट भन्न चाहन्छु। यस पहिले एनआरएनका केही साथीहरुले सानो रुपमा जल विद्युत परियोजनामा यसरी लगानी गरेर प्रतिफल लिइरहनु भएको छ भने अन्य प्राय: लगानी व्यक्तिगत रुपमा भैरहेको छ,तर इमर्जिंग नेपाल फण्ड चाहिं सामुहिक लगानीको अवसर हो जसलाई संगठित रुपमा लगानी र सबै सदस्यले प्रतिफल पाउने गरी परियोजना संचालन गरिनेछ'अध्यक्ष पन्तले भने। 
साना एवं मध्यम व्यवसाय गरेर बसिरहेका गैर आवासीय नेपालीहरुले पनि नेपालमा संगठित रुपमा लगानी गर्न र त्यसको प्रतिफल लिन सकुन् भन्ने उद्देश्यले यस्तो कोषको अवधारणा अघि सारिएको अध्यक्ष पन्तको भनाई छ। यो कोषमा संकलित रकम नेपालमा पूर्वाधार निर्माण र अन्य प्राविधिक क्षेत्रमा लगानी गरिनेछ र प्राथमिकताका आधारमा परियोजना छनौट गरिनेछ। दश अरब रुपैयाँको यस कोषमा सर्वसाधारण एनआरएनहरुको पचासी प्रतिशतसम्म लगानी रहनेछ। बाँकी नेपाल सरकार,निजी कम्पनी र एनआरएनका सिमित लगानीकर्ता र कोषका संचालकहरुको शेयर रहनेछ। 
यसैबीच यो कोषमा लगानीका बारे जानकारी दिने उद्देश्यले एनआरएन अमेरिकाज क्षेत्रले एक जानकारीमूलक छलफल कार्यक्रमको आयोजना गरेको छ। आइतवार यस क्षेत्रका क्षेत्रीय संयोजक राजन त्रिपाठीले संयोजन गरेको यो छलफलमा एनआरएनका अध्यक्ष कुमार पन्त,कोषका लागि नेपालमा काम गरिरहेका सीपीए अनलराज भट्टराईलगायतले कोषमा लगानी र प्रतिफलका बारे जानकारी दिएका थिए। छलफलमा एनआरएन आइसीसीसी सच्वी गौरीराज जोशी,सल्लाहकार हरिबोल भण्डारी,एसी शेर्पा, एनआरएन अमेरिकाका अध्यक्ष सुनील साह,व्यवसायी राधेश पण्डित,आइसीसी र एनसीसीका पदाधिकारी तथा सदस्यहरु र क्यानडाका एनआरएन प्रतिनिधिहरुको सहभागिता रहेको थियो। सहभागीहरुले कोषमा लगानी र प्रतिफलका विषयमा अध्यक्ष पन्त र सीपीए भट्टराईसंग विभिन्न जिज्ञासा राखेका थिए भने क्षेत्रीय संयोजक त्रिपाठीले सबैलाई धन्यवाद व्यक्त गरेका थिए।  


Space for Advertisement
Contact info@globenepal.com
Space for Advertisement
Contact info@globenepal.com
प्रतिक्रिया दिनुहोस्
भर्खरै सबै


© 2021 All rights Reserved to globenepal.com
Powered By: MeroDomain.Com