अमेरिकाबाट रिलिज भयो रामप्रसाद खनालको अर्को नयाँ गीत ‘एउटा ढुकुर उडिगयो’

अमेरिकाबाट रिलिज भयो रामप्रसाद खनालको अर्को नयाँ गीत ‘एउटा ढुकुर उडिगयो’



नेपालबाट भर्खर अमेरिका फर्केका वरिष्ठ लोक तथा दोहोरी गायक एवम् पत्रकार रामप्रसाद खनालले अमेरिकाबाट आफ्नो अर्को नयाँ र फरक शैलीको सेन्टिमेन्टल दोहोरी गीत ‘एउटा ढुकुर उडिगयो’ युट्युबबाट संसारभर र नेपालमा जनता टेलिभिजन, जनता टेलिभिजनबाट एक साथ रिलिज गरेका छन् ।

दोहोरी गीत लाने र ल्याउने मात्र हुँदैनन्, कथा र व्यथाका पनि बन्छन्, फरक शैलीका पनि बन्छन्, त्यही फरक शैलीको प्रयोग गरेको छु मैले यो गीत “एउटा ढुकुर उडिगयो” मा रामप्रसाद खनाल भन्छन् । खनालको आफ्नै शब्द र अभिनयमा आएको नयाँ गीतमा सुनिता बुढाले खनाललाई स्वरमा साथ दिएकी छिन भने अभिनयमा शोभा त्रिपाठीको मिठो साथ रहेको छ । त्यसै गरी खनाललाई निर्मल शर्माले निर्देशन र अभिनयमा दुबैमा साथ दिएका छन् । थानेस्वर गौतमको सङ्गीत, कमल सरगमले सङ्गीत संयोजन गरेको यो गीत रामप्रसाद खनालको बाउन्नौँ एल्बममा समावेश भएको छ । राजु केसीको छायाङ्कन रहेको उक्त भिडियो गौतम राज खड्काले सम्पादन गरेका छन् ।

अन्तर्राष्ट्रिय कलाकार मञ्चलाई अमेरिकाबाट लिड गरेका संस्थापक अध्यक्ष खनाल गीतहरूमा मौलिकपन दिने परिचय बनाएका कलाकार हुन । यो गीतमा पनि फरक शैली र प्रयोग गर्न खोजेका छन् । नेपाली लोक गीत, दोहोरी गीत, आधुनिक, राष्ट्रिय गीतहरू लगायतका सबै खाले गीतहरू रचना गरेका, गाएका अग्रज गायक खनालको यो गीत मात्र होइन उनले गाएका हरेक गीतमा समाज झल्किएको देखिन्छ । खनाल भन्छन् – “म भाइरल वा चर्चित हुन कहिल्यै गीत गाएको पनि छैन र गाउने पनि छैन ।

म एउटा लोक गायक, दोहोरी गायक हुँ त्यसैले मैले लेख्ने, गाउने, अभिनय गर्ने कुनै पनि गीत वा सिर्जनामा मैले लोकको इज्जत र सम्मान गर्नुपर्छ। म त भन्छु लोकका कलाकार हुँ भन्ने हामीले गाउने अभिनय गर्ने कुरामा मात्र होइन लाउने, खाने, बोल्ने हर कुरामा लोकको सम्मान हुने गरी सोच्नु पर्छ, व्यवहार गर्नुपर्छ। हरेक परिवारले हजुर बा,हजुर आमा,बा,आमा, परिवार सबै जना सँगै बसेर हाम्रा गीत सुन्न हेर्न सक्ने खालका हुनुपर्छ नत्र हामी के को लोक गायक ? के को कलाकार ?” स्मरण रहोस् अन्तर्राष्ट्रिय कलाकार मञ्चका अध्यक्ष समेत रहेका खनालले हाल सम्म एक हजार दुई सय भन्दा बढी लोक, दोहोरी, आधुनिक, राष्ट्रिय, भजन, तीज लगायतका सबै जसो विधाका गीत गाइसकेका छन् भने बाउन्न वटा गीति एल्बम प्रकाशित गरिसकेका छन्। छापा पत्रकारिता देखी रेडियो, टेलिभिजन,अनलाइन पत्रकारिता सम्म पोख्त खनालका पन्ध्र सय भन्दा बढी कविता, गजल, मुक्तक र विभिन्न १८ वटा पुस्तक प्रकाशित छन्।

मतदान गर्न

बाँकी