जुम्ला । जिल्ला समन्वय समिति (जिसस) जुम्लाको निर्वाचन यही जेठ २९ गते हुने भएको छ । जिल्ला न्यायाधीशसमेत रहेका मुख्य निर्वाचन अधिकृत जवाहरप्रसाद सिंहले निर्वाचनका लागि आज मतदाता नामावली प्रकाशन गरिसकिने बताए ।

२४ गते भने उम्मेदवारी गर्दा र २७ गते उम्मेदवारलाई निर्वाचन चिह्न प्रदान गरिने पनि जानकारी दिएका छन् । प्रमुख र उपप्रमुखसहित नौं सदस्यीय समन्वय समितिका लागि निर्वाचन हुनेछ ।

मतदान भने जिल्लाका आठ वटा स्थानीय तहका प्रमुख/उपप्रमुख वा अध्यक्ष/उपाध्यक्षले गर्न पाउनेछन् । उनीहरूको सङ्ख्या १६ छ । सर्वाधिक नेपाली कांग्रेसको पाँच अध्यक्ष र दुई उपाध्यसँगै एक उपप्रमुख गरी आठ जना छन् ।

नेकपा (माओवादी केन्द्र)का दुई अध्यक्ष र चार जना उपाध्यक्ष तथा नेकपा (एकीकृत समाजवादी)का एक नगरप्रमुख र एक जना उपाध्यक्ष रहेको जिल्ला निर्वाचन कार्यालय जुम्लाले जनाएको छ ।

सामान्य बहुमतले समन्वय समिति गठन गर्न नौं मत चाहिन्छ । तर, कुनै दलको छैन । कांग्रेसलाई एकल रूपले समन्वय समिति गठन गर्न एक मत अभाव छ । माओवादीलाई तीन मत आवश्यक छ ।

त्यसो हुँदा कसरी समन्वय समिति गठन हुन्छ ? यसै भन्न सकिने अवस्था छैन । तर, यदि तालमेल भए कांग्रेसले समन्वय समिति प्रमुख पद लिने चर्चा छ ।

यसअघि २०७४ को निर्वाचनमा समन्वय प्रमुख माओवादी केन्द्रका लालबहादुर सार्की र उपप्रमुखमा काँग्रेसका कार्मा बुढा रहेका थिए ।