काठमाडौं । नेकपा (एकीकृत समाजवादी)का अध्यक्ष माधवकुमार नेपालले आगामी निर्वाचनसम्म गठबन्धन जोगाएरै अघि बढने बताएका छन् ।

आइतबार सम्पादहरूसँगको संवादमा उनले गठबन्धनको बलमा स्थानीय तह निर्वाचनमा पोखरा महानगर जितेको भन्दै गठबन्धनलाई निरन्तरता दिने बताएका हुन् । उजले गठबन्धनभित्र संघ र प्रदेशको निर्वाचन मंसिर महिनालाई आधार बनाएर छलफल भइरहेको भन्दै सिट संख्याको टुंगो लाउने विषयमा छलफल भइरहेको बताए ।

“हामीले पार्टीमा गठबन्धनको गीत गाउन बन्द गर्नुस् भनेका छौँ । संगठनको बिस्तारमा लाग्नुस् । टोलसम्म पुर्‍याउने संगठन पुर्‍याउने काममा लाग्नुस् भनेका छौँ,” उनले भने, “निर्वाचनमा कति मत पायौँ भनेर विश्लेषण गरिरहेका छौँ । गठबन्धनकै कारण महानगर पनि जितेका हौँ ।”

उनले आज बिहान बालुवाटारमा प्रधानमन्त्री शेरबहादुर देउवालगायतसँग पनि छलफल गरिएको बताए। कमजोरीका समीक्षा गर्दै मिलेरै अगाडि बढ्नेबारे सत्ता गठबन्धनका शीर्ष नेताबीच छलफल भएको उनले बताएका छन्।

‘आज बसेको तीन नेताको बैठकले गठबन्धन जोगाउँदै चुनावको तयारी गर्ने निष्कर्ष निकालेको छ’ नेपालले भने,‘चुनावको कमि कमजोरी समीक्षा गर्न ५ दलको बृहत बैठक राख्ने पनि सहमति भएको छ।’