काठमाडौं । काठमाडौं ५ मा नेपाली कांग्रेसका युवा नेता प्रदीप पौडेल र नेकपा एमालेका वरिष्ठ उपाध्यक्ष ईश्वर पोखरेलबीच प्रतिस्पर्धा हुने भएको छ ।

शनिवार मध्यरातसम्म बसेको कांग्रेस संसदीय बोर्डले पौडेललाई काठमाडौं-५ बाट उठाउने निर्णय गरेसँगै एमालेका वरिष्ठ उपाध्यक्ष पोखरेलसँग प्रतिस्पर्धा हुने भएको हो । सत्तारुढ गठबन्धनबीचको भागबण्डामा आफ्नो भागमा परेको काठमाडौं-५ मा कांग्रेसले पौडेललाई उम्मेदवार बनाउने निर्णय गरेको हो ।

काठमाडौं–५ मा अर्थशास्त्री स्वर्णिम वाग्लेको समेत चर्चा रहेकोमा अन्तिममा पौडेलले टिकट पाएका हुन् । यसअघि कांग्रेसका डा. प्रकाशशरण महतलाई पराजित गर्दै २०७४ सालको प्रतिनिधि सभा निर्वाचनमा पोखरेल विजयी भएका थिए ।