पोखरा । प्रधानमन्त्री तथा नेपाली कांग्रेसका सभापति शेरबहादुर देउवाले गठबन्धनमा शंका पैदा हुने काम नगर्न नेता कार्यकर्ताहरुलाई आग्रह गरेका छन्।

शुक्रबार पोखरामा पाँचदलीय गठबन्धनले आयोजना गरेको कार्यकर्ता भेलालाई सम्बोधन गर्दै देउवाले गठबन्धन आजको आवश्यकता भएको भन्दै शंका पैदा गर्ने, मतभिन्नता ल्याउने कुनै पनि काम नगर्न आग्रह गरे । ‘कुनै पार्टीको बहुमत आउन सक्दैन, त्यसैले पार्टीहरू मिल्नुपरेको छ’, उनले भने, ‘गठबन्धनका साथीहरूलाई शंका पैदा गर्ने, मतभिन्नता ल्याउने कुनै पनि काम नगरौं ।’

प्रधामनमन्त्री देउवाले आगामी चुनावपछि गठबन्धनको सरकार बन्यो भने सबैले ठाउँ पाउने पनि आश्वासन दिए । उनले भने, ‘हाम्राबीचमा सबै पार्टीका साथीहरूले कसैले टिकट पाउनुभएन होला, कतिले पाउनुभयो होला । सबै पार्टीमा त्यस्तै छ । सबैको पालो आउँछ । गठबन्धनको सरकार बन्यो भने सयौं ठाउँ हुन्छन् ।’