काठमाडौं । नवनियुक्त प्रहरी महानिरीक्षक वसन्तबहादुर कुँवरले प्रहरी प्रधान कार्यालयले प्रहरी सेवाका सन्दर्भमा अघि सारेका कामलाई निरन्तरता दिँदै सेवालाई अझै प्रभावकारी र चुस्त बनाउने प्रतिबद्धता जनाएका छन् ।

प्रहरी प्रधान कार्यलयमा शुक्रबार साँझ अवकाश पाएका प्रहरी महानिरीक्षक धीरजप्रताप सिंहसहितका प्रहरी अधिकारीलाई बिदाइ गदै उनले अग्रजहरुले गरेको मार्ग–निर्देशन अक्षरश पालना गर्ने र अधुरा रहेका योजनालाई आफूले पूरा गर्ने विश्वास दिलाए ।

उनले प्रहरी महानिरीक्षक सिंहलगायतको उच्च अधिकृतले प्रहरी सेवामा अनवरत नेतृत्वमा रहेर पु-याएको सेवाप्रति अभार व्यक्त गरे । उनले अवकाश पाएका महानिरीक्षक सिंहको आगामी जीवनको सफलताको शुभकामना दिए । निवर्तमान महानिरीक्षक सिंहले प्रहरी सेवामा ३० वर्षे प्रावधान हटाएर जागीर लम्ब्याउने प्रयास गरेका थिए । तर उनी सफल भएनन्, उनले शुक्रबार राति १२ बजेपछि अवकास पाए ।

अवकाश पाएका प्रहरी महानिरीक्षक सिंहले आफ्नो कार्यकालमा सबै निर्वाचनलाई शान्तिपूर्ण रुपमा सम्पन गर्न सफल भएको र उक्त कार्यका लागि प्रहरी कर्मचारीबाट प्राप्त साथ र सहयोगको खुलेर प्रशंसा गरे । उनले प्रहरी कर्मचारी पनि शान्ति मिसनमा जाने सन्दर्भका विषयलाई आफूले अघि बढाएकाले अबको नेतृत्वले त्यो पूरा गरेर रोकिएका कार्यलाई निरन्तरना दिने विश्वास व्यक्त गरे ।

उनले नवनियुक्त महानिरीक्षक कुँवरको कार्यकाल सफलताको शुभकामना दिए । सिंहसहित उनका ब्याची आज राति १२ बजेबाट अबकाश पाए । नवनियुक्त महानिरीक्षक कुँवरले शनिबारदेखि कार्यभार सम्हालेका छन् ।

सिंहसँगै नौ प्रहरी अधिकृत अवकाशमा
धीरजप्रताप सिंहसहित उनका ब्याजी ९ जना प्रहरी अधिकृतहरु आजबाट अनिवार्य अवकाशमा गए । गत वैशाख १८ मा महानिरीक्षक पदमा पदोन्नति भएका सिंहले झण्डै एक वर्ष महानिरीक्षक भएर सेवा गरे । उनका ब्याचीहरु प्रहरी अतिरिक्त महानिरीक्षक (एआइजी) सहकुलबहादुर थापा, उत्तमराज सुवेदी र दिवेश लोहनीले अवकाश पाए ।

गएराति १२ बजेदेखि उनीहरुको कार्यकाल सकिएका हाे । हिजाे शुक्रबारै मन्त्रिपरिषद् बैठकले आजदेखि लागू हुने गरी प्रहरी महानिरीक्षकमा एआइजी वसन्तबहादुर कुँवरलाई बढुवा गर्ने निर्णय गरेका थियाे । उनीहरुसँगै तीन डिआइजी र दुई एसएसपीले पनि अनिवार्य अवकाश पाए ।

प्रहरी प्रधान कार्यालयअनुसार प्रहरी नायब महानिरीक्षक (डीआइजी)हरु नलप्रसाद उपाध्याय, मोहनकुमार आचार्य र मसाउद आलम खाँ तथा प्रहरी वरिष्ठ उपरीक्षक (एसएसएसपी)द्वय उमाशङ्कर पञ्जियार र जनकराज पाण्डेले अनिवार्य अवकाश पाएकाे प्रहरी प्रवक्ता पोषराज पोखरेलले जानकारी दिए ।