दाङ । रोल्पाबाट दाङको घोराही तर्फ आउँदै गरेको बस दुर्घटनामा परेको छ । ना ५ ख २६१२ नम्बरको बस शहीद मार्ग अन्तर्गत त्रिवेणी गाउँपालिका- ७ मा तिलाबजार नजिकै मंगलबार दिउँसो १ बजे दुर्घटना भएको हो ।

बस दुर्घटनामा परी १५ यात्रु घाइते भएको जिल्ला प्रहरी प्रमुख डिएसपी श्याम सारू मगरले जानकारी दिए । उनका अनुसार तीन जनाको अवस्था गम्भीर छ ।

‘हामीले घाइते १० पुरूष र पाँच महिला उद्धार गरी स्थानीय मेडिकल र स्वास्थ्य चौकीमा उपचारका लागि पठाइसकेका छौं,’ उनले भने, ‘घाइतेमध्ये ३ जनाको अवस्था गम्भीर छ ।’

घाइतेलाई प्रारम्भिक उपचारका लागि स्थानीय स्वास्थ्य चौकी र मेडिकलमा पठाइए पनि थप उपचारका लागि दाङको घोराही वा जिल्ला अस्पतालमा पठाउने भन्नेबारे छलफल भइरहेको उनले बताए ।

बस सडकबाट करिब ९० मिटर तल खसेको प्रहरीले बताएको छ ।

चालक फरार रहेपनि दिउँसो २ बजे सशस्त्र प्रहरीको सम्पर्कमा पुगेको खबर आएको डिएसपी मगरले बताए ।
वर्षाले सडक चिप्लो भएकाले दुर्घटना भएको अनुमान प्रहरीको छ ।