काठमाडौं । गैरआवासीय नेपाली संघ (एनआरएनए) को नयाँ कार्यकालका लागि वर्तमान उपाध्यक्ष महेश श्रेष्ठले अध्यक्ष पदमा औपचारिक रुपमा उम्मेदवारी घोषणा गरेका छन् । शुक्रबार ललितपुरको होटल हिमालयमा पत्रकार सम्मेलन गरेर श्रेष्ठले उम्मेदवारी घोषणा गरेका हुन् ।

उम्मेदवारी घोषणा गर्ने क्रममा श्रेष्ठले आफ्नो पाँच बुँदे प्रतिबद्धता अगाडि सारेका छन् । जसमा ‘अबको कार्यभारः एनआरएनएको हक, हित र अधिकार’, ‘जन्मभूमिका नेपालीलाई कर्मभूमिका नेपालीको साथ’, ‘संरचनागत सुधार र संस्थागत विकास’, ‘समुन्नत नेपालको संकल्प’ र ‘प्राथमिकतामा युवा महिला तथा दोस्रो पुस्ता रहने’ उल्लेख छ ।

आगामी कार्यकालमा अध्यक्षका रूपमा आफूले गर्ने कामलाई पाँच नीतिगत प्राथमिकतामा विभाजन गरी ठोस कार्य योजना प्रस्तुत गरेको उनको भनाइ थियो । उक्त नीतिगत प्राथमिकताको उद्देश्य हासिल गर्न ठोस कार्य योजना पनि श्रेष्ठले अघि सारेका छन् । जसअनुसार नेपालमा वैदेशिक लगानी भित्र्याउन ठोस नीतिगत पहल गर्ने, ज्ञान, सीप तथा नवप्रवर्तन भित्र्याउन ठोस पहल गर्ने, पर्यटन विकासमा पहल गर्ने, गैरआवासीय नेपालीको समस्या समाधान गर्न निर्णायक पहल गर्ने विषय उल्लेख छ ।

उम्मेदवारी घोषणाका अवसरमा श्रेष्ठले विश्वभरका गैरआवासीय नेपाली समुदायसँगको घनिभूत छलफल, सुझाव र प्रेरणापछि ‘समुन्नत नेपाल, सम्मानित गैरआवासीय नेपाली’ बनाउने प्रण गर्दै आगामी अक्टोबरमा काठमाडौँमा हुने ११ औँ महाधिवेशन तथा विश्व सम्मेलनमा अध्यक्ष पदमा उम्मेदवारी दिने निर्णय गरेको बताए ।

उनले सबल, साझा र एकताबद्ध एनआरएनए, परिणाममुखी, पारदर्शी र समावेशी एनआरएनए’ बनाउने आफ्नो प्रमुख उद्देश्य र प्राथमिकता रहने बताए । एनआरएनएको आईसीसी सदस्य, कोषाध्यक्ष र उपाध्यक्षको जिम्मेवारी बहन गर्दै संघको आर्थिक पारदर्शिता र आर्थिक व्यवस्थापनमा महत्त्वपूर्ण भूमिका निर्वाह गरेको उल्लेख गर्दै श्रेष्ठले संघको एमआईएस सिस्टमलाई थप सुरक्षित तथा निर्वाचन प्रणालीलाई विश्वासयोग्य र विवादरहित बनाउन फेस भेरिफिकेसनलाई अनिवार्य बनाउन नेतृत्वदायी भूमिका निर्वाह गरेको स्मरण गरे ।

यसबाहेक परिणाममुखी एनआरएनए बनाउने, सबैको साझा एनआरएनए बनाउन लागिपर्ने, दिगो र स्मार्ट एनआरएनए बनाउने, सरकारसँग सहकार्य गर्दै अघि बढ्ने, महिलाको सहभागिता बढाउने विषय उल्लेख छ ।

आफ्ना नीति योजना र कार्यक्रम कार्यान्वयनका लागि १० वर्षे विस्तृत भिजनरी दस्तावेज बनाउन विशेषज्ञ सम्मिलित एक उच्चस्तरीय समिति गठन गर्ने श्रेष्ठको भनाइ छ । आसन्न महाधिवेशनबाट नयाँ नेतृत्व चयन भएको ६ महिनाभित्र उक्त समितिले विस्तृत भिजनरी दस्तावेज तयार गर्ने पनि श्रेष्ठको भनाइ छ । उक्त प्रतिवेदनअनुसार २०२५ अक्टोबरसम्मको कार्यतालिकालाई संघको वार्षिक क्यालेन्डरमा समावेश गरी कार्यान्वयनमा लगिने श्रेष्ठले बताए ।

श्रेष्ठको टिमबाट वर्तमान महासचिव केशव पौडेलले पनि उपाध्यक्ष पदमा उम्मेदवारी घोषणा गरेका छन् । उनले अध्यक्षमा श्रेष्ठलाई समर्थन गर्दै उपाध्यक्ष पदमा उम्मेदवारी घोषणा गरेका हुन् । सचिव गंगाधर गौतम र अमेरिका एनसीसीका पूर्वअध्यक्ष बुद्धिसागर सुवेदीले महासचिव पदमा उम्मेदवारी घोषणा गरेका थिए । प्रवक्ता सोम सापकोटाले उपमहासचिव पदमा उम्मेदवारी घोषणा गरे । कार्यक्रममा उपाध्यक्ष नरेन्द्र भाट, युवा उपाध्यक्ष राज रेग्मी, सचिव प्रविन गुरुङले शुभकामना मन्तव्य राखेका थिए ।

कार्यक्रममा सचिव गौतमले अध्यक्ष पदमा वर्तमान अध्यक्ष डा. बद्री केसी र रविना थापाले दाबी गर्न नैतिकताले नदिने बताए । ‘१० औं महाधिवेशन सहमति र सहकार्यमा सम्पन्न भएकाले उहाँहरुले ११ औं महाधिवेशनमा अध्यक्ष पदमा दाबी गर्न नैतिकताले नदिने’ सचिव गौतमको भनाइ थियो ।