काठमाडौं । गैरआवासीय नेपाली संघ (एनआरएनए) तीन टुक्रामा विभाजित भएको छ । अघिल्लो अधिवेशनबाट दुई टुक्रा भएको एनआरएनए हालै काठमाडौंमा सम्पन्न ११औं महाधिवेशनबाट फेरि विभाजित भएको हो ।

एनआरएनएका पूर्व अध्यक्ष शेष घलेको समर्थनमा बिनोद कुँबर अध्यक्ष रहेको एनआरएनएले अर्काे वर्ष महाधिवेशनको मिति तोकेको छ भने हालै काठमाडौंमा सम्पन्न अर्काे एनआरएनएको अधिवेशनको मतपरिणामलाई लिएर विवाद भएको हो ।

इलेकट्रोनिक सिस्टमबाट भएको निर्वाचन परिणाम अनुसार बद्री केसीले आफू अध्यक्ष भएको घोषणा गरेपछि अन्य दुई अध्यक्षका उम्मेदवारले मतपरिणाम अस्वीकार गरे । त्यसपछि दुई अध्यक्षबीचको सहमतिमा राजेन्द्रकुमार (आरके) शर्माको नेतृत्वमा नयाँ कार्यसमिति निर्वाचित भएको घोषणा गरिएको छ । शर्मालाई सर्वसम्मतरुपमा २०२३–२५ का लागि अध्यक्षमा चयन गरिएको जनाइएको छ । नयाँ कार्यसमितिको उपाध्यक्षमा डा.केशव पौडेल, खगेन्द्र न्यौपाने, राज रेग्मी, नारायण आचार्य, सुनिल शाह, गङ्गाधर गौतम, गोबिन्द श्रेष्ठ(रोविन)चयन भएका छन् । त्यस्तै महिला उपाध्यक्षमा रोजिना प्रधान राई र युवा उपाध्यक्षमा अबदुल वासिद चयन गरिएको निर्वाचन समितिले जानकारी दिएको छ । त्यस्तै महासचिबमा बुद्धि सागर सुवेदी सर्वसम्मत रुपले चयन भएका छन् ।

उपमहासचिवमा सोम सापकोटा, प्रबिन गुरुङ, कृष्ण गिरी र प्रमोद सिटौला चयन भएका छन् भने सचिवमा कृष्णजीवि पन्थ, लोक दाहाल, दयानिधी सापकोटा, टंक गैरे, केपी सिटौला, स्वतन्त्र प्रताप सिंह, मनोज गोर्खाली चयन भएका छन् । महिला सचिव बिमला सापकोटा चयन भएकी छन् ।

कोषाध्यक्षमा ठाकुर प्रसाद ढुङ्गाना र सह कोषाध्यक्ष तिलक गैरे, कृष्णा तिमल्सिना, मोहम्मद मुस्तफा साथै महिला सहकोषाध्यक्षमा तृष्णा शर्मा चयन भएका छन् ।

यता महिला संयोजकमा देविका केसी, युवा संयोजकमा रविन अधिकारी, क्षेत्रीय संयोजकतर्फ युरोपबाट चिन्तामणी सापकोटा, युरोपबाटै क्षेत्रीय उपसंयोजक शंकर डाँगी, भीमसेन थापा,हरि खत्री र रमेश काफ्लेको नाम सर्वसम्मत गरिएको छ । यसैगरी युरोप युवा संयोजक रमेश भण्डारी, युरोप महिला संयोजक गीता थापा खनाल र महिला सह संयोजक भवानी तिवारी चयन भएका छन् | त्यस्तै मध्यपूर्व संयोजकमा राजेन्द्र अर्याल, मध्यपूर्व उप संयोजकमा रमेश श्रेष्ठ, माधव पौडेल, लाल पुन चयन गरिएको छ । सम्पूर्ण कार्यसमितिको नामावली अन्तिम टुंगो लागेपछि केही दिनभित्र शपथ कार्यक्रम राखेर काम अघि बढाइने अध्यक्ष शर्माले जानकारी दिए ।

बद्री केसी समूहले शनिबार नै सपथ खाएको छ भने शर्माको समूहले केहि दिनमा सपथ ग्रहण गर्ने जनाएको छ ।

यसैगरी बन्द सत्रले डी बी क्षेत्रीको अध्यक्षतामा आनन्द बिष्ट, डा बलराम श्रेष्ठ, ओम शर्मा, बेद खरेल रहेको एक अध्यक्ष मण्डल गठन गरेको छ। त्यस्तै दुर्गा आचार्यको संयोजकत्वमा विश्व बराल, नारायण थापा, शनि ओली, बिष्णु सुवेदी र पुष्प थापा सदस्य रहेको निर्वाचन समिति पनि गठन गरेको छ। बन्द सत्रले महासचिव डा केशव पौडेल, कोषाध्यक्षहरु सुनील साह, लोक दाहाल तथा विधान समितिका सचिव गंगाधर गौतमले पेश गरेका प्रतिवेदन हरु पारित गरेको थियो।

निर्वाचन समितिका संयोजक दुर्गा आचार्यले सबै नव निर्वाचित पदाधिकारीहरुलाई विधान बमोजिम शपथ दिलाएका थिए। बन्द सत्रको अध्यक्षता अध्यक्षद्वय कुल आचार्य तथा रबिना थापाले गरेका थिए ।