बुटवल । नुवाकोटबाट फर्किँदै गरेको कार दुर्घटनामा परी ३ जनाको मृत्यु भएको छ । पाल्पाको नुवाकोट घुमेर फर्किँदै गरेको लु २ च ८५३१ नम्बरको कार बुधबार करिब साढे ९ बजेतिर दुर्घटना भएको हो ।

सडकदेखि करिब दुई सय मिटर तल खसेर भएको दुर्घटनामा स्याङ्जा पुतलीबजार घर भई हाल बुटवल -१० बस्दै आएका चालक ५६ वर्षीय रामप्रसाद शर्मा, तिलोत्तमा–३ की ५७ वर्षीया आशा श्रेष्ठ र सोही ठाउँकी ५० वर्षीया भगवती श्रेष्ठको मृत्यु भएको प्रहरीले जनाएको छ ।

उपचारका लागि लुम्बिनी प्रादेशिक अस्पतालमा ल्याइएको र उपचारको क्रममा उनिहरुको मृत्यु भएको इलाका प्रहरी कार्यालय बुटवलले जनाएको छ । दुर्घटनामा परी बुटवल उपमहानगरपालिका–९ बस्ने चन्द्रा श्रेष्ठ र बुटवल–११ बस्ने लक्ष्मीता श्रेष्ठ घाइते भएको प्रहरीले जनाएको छ ।

उनीहरुको लुम्बिनी प्रादेशिक अस्पतालमा उपचार भैरहेको र स्वास्थ्य अवस्था सामान्य रहेको प्रहरीले जनाएको छ । घटनाबारे थप अनुसन्धान जारी रहेको इलाका प्रहरी कार्यालय बुटवलमा प्रमुख डीएसपी विजयराज पण्डितले बताए ।