बागलुङ । गएको मङ्गलवार बागलुङको बडिगाड गाउँपालिका–१० आरुपाटामा खसेको पहिरोमा परी बेपत्ता भएकामध्ये थप एक जनाको शव फेला परेको छ । दुई जना अझै बेपत्ता छन् ।

पहिरोमा परी बेपत्ता भएकी सात वर्षीया मधु बुढाको शव आज बिहान फेला परेको हो । १० वर्षीय मनोज बुढा र ११ वर्षीय सुमन थापा अझै बेपत्ता रहेका प्रमुख जिल्ला अधिकारी नेत्रप्रसाद सुवेदीले जानकारी दिए ।

पहिरोले पुरेर ज्यान गुमाएका ७८ वर्षीय जोगबहादुर बुढा, १४ वर्षीय यमलाल विक, ११ वर्षीया सीता पुन, आठ वर्षीया अमल बुढा, सञ्जु विककी छ महिनाकी छोरी सीता र ७० वर्षीया मैतीदेवी विकको शव मङ्गलवार नै फेला परेको थियो । तीन वर्षीय आरुस थापाको शव बुधवार दिउँसो भेटिएको थियो ।

यस्तै पहिरोमा परी घाइते भएका तीन जनाको काठमाडौँको त्रिभुवन विश्वविद्यालय शिक्षण अस्पताल महाराजगञ्जमा उपचार भइरहेको छ ।