काठमाडौं । एमालेका नेता तथा पूर्वमन्त्री र कलाकारसहित ११ जना हाइप्रोफाइल जुवाडे आइतबार पक्राउ परेका छन् । गौरीघाटबाट कोशी प्रदेश सांसद तथा पूर्वमन्त्री बुद्धिकुमार राजभण्डारीसहित ११ जनालाई जुवा खेल्दै गरेको अवस्थामा पक्राउ गरीएको प्रहरीले जानकारी दिएको छ ।

पक्राउ पर्नेमा प्रदेश सांसद तथा कोशी प्रदेशका पूर्वमन्त्री बुद्धिकुमार राजभण्डारी, सोलुखुम्बुको सोताङ गाउँपालिकाका पूर्वअध्यक्ष बीरबहादुर राई र कलाकार पुरुषोत्तम शर्मासहित ११ जना रहेको प्रहरीले जानकारी दिएको छ । शर्मा टेलिसिरियल ‘सक्किगो निँ’ का कलाकार पनि हुन् ।

प्रहरीले जुवा खालबाट १ लाख नगद बरामद गरेको छ । शनिबार पक्राउ गरेर प्रहरीले उनीहरूको बयान लिइसकेको छ । आइतबार सरकारी वकिल कार्यालयमा अनुसन्धान प्रतिवेदन बुझाइने जिल्ला प्रहरी परिसर काठमाडौंका अधिकृतले जानकारी दिएका छन् ।

पक्राउ पर्नेहरुमा उत्तमकुमार राई, अनिश तामाङ, ठुला तामाङ, दिपक खड्का, भीमबहादुर साम्बाहाम्फे, रवि श्रेष्ठ, राजु महत र माधव थापा छन् । माधव थापा बिरामी रहेको अनुसन्धामा संलग्न ती अधिकृतले जानकारी दिएका छन् ।