काठमाडौं । नेपाल पत्रकार महासंघको २७ औं महाधिवेशनअन्तर्गत मतदान भइरहेको छ । शुक्रबार ९ बजेदेखि जिल्ला, प्रदेश र केन्द्रीय कार्यसमितिका लागि एकैचोटी मतदान भइरहेको हो । अपरान्ह ४ बजेसम्म मतदान गर्न पाइने निर्वाचन समितिले जनाएको छ ।

निर्वाचन समितिका संयोजक प्रा. चिरञ्जीवी खनालले १३९ वटा निकायमध्ये केही प्रतिष्ठानका क्षेत्रहरुलाई गाभिएर मतदान भइरहेको जानकारी दिए । तर, गोरखा जिल्लामा भने मतदान सुरु हुन नसकेको उनले बताए ।

संयोजक खनालले मतदानका लागि छलफल भइरहेको र केही समयमा मतदान सुरु हुने जानकारी दिए । पत्रकारहरु उत्साहका साथ मतदान गरिरहेका छन् । देशभर नौ हजारभन्दा बढी मतदाता छन् ।