सिरहा। सिरहाको बिष्णुपुर गाउँपालिकाकी उपाध्यक्षले अध्यक्ष चढ्ने पालिकाको गाडी तोडफोड गरेकी छिन्  । समयमा लिन नआएको भन्दै उपाध्यक्ष गीताकुमारी सिंहले पालिको बा. २  झ ३६४३ नम्वरको सरकारी स्कोरपियो गाडी तोडफोड गरेकी हुन् ।

उपाध्यक्ष सिंहले इँटा र ढुङ्गाले हानेर झ्याल र ढाेकाको शिशा फूटाउनुको साथै गाडीको विभिन्न भाग कुच्याएको चालक बाबुनाथ यादवले  बताए। हाल अध्यक्ष र उपाध्यक्ष एउटै गाडी चढ्दै आएको छ।

अध्यक्षले गाडी कब्जामा राख्ने र उपाध्यक्षले कुनै काममा जान गाडी माग्दा समयमा नदिंदा उपाध्यक्ष आक्रोशित हुँदै आएको एक स्थानीयले बताए।  आज पनि उपाध्यक्षले गाडी लिन बोलाउँदा नआएपछि गाउँपालिका अध्यक्षकै घरअगाडी रोकिराखेको गाडी उपाध्यक्षले तोडफोड गरेकी हुन् । उपाध्यक्षले ९ बजे नै घरमा लिन आउन बोलाएका थिए समयमा नगएको भन्दै तोडफोडमा उत्रेको अध्यक्ष यादवले बताए।

गाउँपालिका अध्यक्ष र प्रमुख प्रशासकीय अधिकृत चारचक्के गाडी चढे पनि उपाध्यक्षलाई भने गाडी सुविधा दिएको छैन। कार्यालयको एक थान सरकारी स्कोरपीओ र प्रशासकीय अधिकृत भाडाको गाडीमा चढ्दै आएको छ। उपाध्यक्ष भने आफ्नो निजी मोटरसाइकल चढ्दै आएकी छिन्। 

आज कार्यक्रममा जान अध्यक्षसँग गाडी माग्दा पठाउँदै छु भनेर नपठाएपछि आक्रोशित उपाध्यक्षले बाध्यभएर गाडी तोडफोड गरेको बताइन्छ।