काठमाडौँ । गैर आवासीय नेपाली संघको अधिवेशन गराउनका लागि सरकारी सहजीकरणका लागि परराष्ट्र मन्त्रालयले कर्मचारी तोकेको छ । कानुन, न्याय तथा संसदीय मामिला मन्त्रालयका सहसचिव अरुणा जोशीलाई सरकारी तहबाट सहजीकरण गर्नका लागि जिम्मेवारी तोकिएको छ ।

संघका पूर्व अध्यक्ष शेष घलेलाई मन्त्रालयले आइतबार पत्र लेखेर सहजकर्ता तोकेको जानकारी गराएको हो । परराष्ट्र मन्त्रालयले मन्त्रीस्तरको निर्णयका आधारमा जोशीलाई तोकिएको जानकारी गराएको छ ।

सर्वोच्च अदालतले गत चैतमा संघका पूर्व अध्यक्ष घले नेतृत्वको उच्च स्तरीय समितिलाई निर्वाचन गराउने आदेश दिएको थियो ।

घले नेतृत्वमा रहेको एनआरएनएले मे ३ देखि ५ सम्म काठमाडौंमा एकता महाधिवेशन गर्ने मिति तय गरेको छ । तोकिएको समयमा अधिवेशन गराउन सहजीकरण गर्ने गरी सरकारी सहजकर्ता तोकिएको परराष्ट्र मन्त्रालयले घलेलाई लेखेको पत्रमा उल्लेख छ ।