छोटो रुटबाट हिमाललाई स्पर्स गर्ने चाहना राख्नेहरूका लागि मार्दी ट्रेक एउटा अवसर हो । कास्कीको घना जङ्गल, हरियाली र बस्तीहरूको बीचमा रहेको मार्दी हिमाल पदयात्राले यात्रुहरूलाई हिमशृङ्खलाका एकपछि अर्को सौन्दर्यसँग परिचित गराउँछ। हिउँले ढाकिएका सेता हिमाल, डाँडाकाँडा र सफा बाटोले यात्रालाई बेग्लै अनुभूति दिन्छ।

यस मार्गको आकर्षण मुख्यतः मार्दी हिमाल, माछापुच्छ्रे, अन्नपूर्ण साउथ, हिमचुली, अन्नपूर्ण प्रथम, गङ्गापूर्ण, र गन्धर्व चुली जस्ता उच्च हिमालहरूको दृश्यावलोकन गर्ने अवसर पाइन्छ। एकै यात्रामा यति धेरै हिमालहरूलाई नियाल्न पाउनु यो पदयात्राको विशेषता हो । पर्यटक यहाँ पुगेर भ्यू प्वाइन्टबाट पोखरा उपत्यका र वरपरका अन्य क्षेत्रहरूको दृश्यावलोकन गर्न सक्छन्।

हाइ क्याम्पबाट सूर्योदयको मनमोहक दृश्य देखिन्छ । हाइ क्याम्प पुग्नका लागि अप्पर क्याम्पबाट २ घन्टा लाग्छ । सूर्योदय हेर्न पर्यटकहरु बिहान ३ बजेदेखि यात्रा सुरु गर्छन् । करिब २ घन्टाको यात्रापछि ६ बजे सूर्योदय हेर्नका लागि पुगिन्छ । पदयात्रा गर्न पोखराबाट टुर गाइड लिन उपयुक्त हुन्छ । किनभने जंगलको बाटो भएकाले हराउन सक्ने सम्भावना रहन्छ ।

पोखराबाट २२ किलोमिटरको दूरीमा अवस्थित माछापुच्छ्रे गाउँपालिकाको घलेलबाट यात्रा सुरु गर्न सकिन्छ। दुई २ घन्टा मोटरबाट यात्रा गरेपछि पदमार्गको प्रस्थान विन्दु भेटिन्छ । गन्तव्यमा पुग्नका लागि मुख्यतः ४ वटा बाटा छन् । फरेस्ट क्याम्प, लोहर क्याम्प, अप्पर क्याम्प, हाइ क्याम्प (भ्यु प्वाइन्ट) र बेस क्याम्पबाट यात्रा तय गर्न सकिन्छ । अन्ततः चार हजार ५०० मिटर उचाइको मार्दी हिमालको आधार शिविरमा पुगिन्छ।

बेस र हाइक्याम्पमा बाहेक अन्य प्रस्थान विन्दुमा सुविधाजनक बास बस्ने स्थान उपलब्ध छ । ३ देखि ५ दिनमा सकिने यो यात्राभरि काहिँकतै फोहोर देख्न पाइँदैन । यस ट्रेकले आन्तरिक र बाह्य पर्यटक आकर्षित गरेको छ । यस क्षेत्रको पर्यटन क्षेत्रमा ठूलो वृद्धि भएको छ। यो क्षेत्रमा अल्ट्रा म्याराथन विश्वकपसमेत भइसकेकाले अन्तरराष्ट्रिय क्षेत्रमा समेत यो पदमार्ग परिचित छ।

यहाँको प्राकृतिक सौन्दर्यलाई संरक्षण गर्ने प्रयास साच्चै लोभलाग्दो छ । पाँच वर्षअघि गुमनाम जस्तो देखिने यो पदमार्ग अहिले व्यवसायिक रूपमा फस्टाएको छ। होटल र रेष्टुराँहरूको आगमनले पर्यटकलाई सहज बनाएको छ।