काठमाडौं । प्रधानमन्त्री केपी ओलीले कुलमान घिसिङलाई विद्युत् प्राधिकरणको कार्यकारी निर्देशकबाट हटाउनुको कारणबारे आज संसद्मा जवाफ दिँदै छन् । प्रतिनिधि सभा बैठक विहान ११ बजेका लागि बोलाइएको छ ।

सभामुख देवराज घिमिरेले प्रमुख राजनीतिक दलका प्रमुख सचेतकहरूसँग गरेको छलफलमा कुलमानबारे प्रधानमन्त्रीले आज जवाफ दिने सहमति भएको हो । कार्यकाल ४ महिना बाँकी छँदै हटाइएका कुलमानका विषयमा प्रधानमन्त्रीले संसद्मै जवाफ दिनुपर्ने माग गर्दै विपक्षी दलले लगातार सदन अवरुद्ध गरिरहेका छन् ।

सरकारले यही चैत ११ गते कुलमानलाई हटाउँदै विद्युत् प्राधिकरणको कार्यकारी निर्देशकमा हितेन्द्रदेव शाक्यलाई नियुक्त गरेपछि विपक्षी रुष्ट छ । सोही कारण प्रतिनिधि सभा र राष्ट्रिय सभामा बैठक नियमित एजेण्डामा प्रवेश गर्न सकेका छैन ।