काठमाडौं । नेपाली कांग्रेसको केन्द्रीय समिति बैठक आज पनि बस्दैछ ।

सत्तारुढ नेपाली कांग्रेसले सरकारका काम, पार्टीका भ्रातृ संस्थाको महाधिवेशनमा छलफल गर्न बैठक बोलाएको हो । तीन दिनसम्म बोल्ने केन्द्रीय सदस्यहरुले सरकारमा कांग्रेसको सहभागिता प्रभावकारी नभएको, पार्टीभित्र आन्तरिक एकता कमजोर भएको गुनासो गरेका छन ।

पार्टीले संसदमा उठाइरहेका विषय र संसदको कामकारबाहीका विषयमा पनि प्रश्न उठेको छ । यसैबीच कांग्रेस बैठकले नेपाल तरुण दलको महाधिवेशन निर्देशन समितिको प्रस्ताव अनुरूप मङ्सिर २६ देखि २८ गतेसम्ममा अनिवार्य सम्पन्न गर्ने गरी केन्द्रीय समितिको पदावधि थप गर्ने निर्णय गरेको छ ।

साथै बैठकले तयारी र व्यवस्थापन सहजीकरणका लागि नेपाल तरुण दलको मौजुदा कार्यसमितिभित्रैबाट सानो व्यवस्थापन समिति बनाउने निर्णय गरेको छ । महाधिवेशन सम्पन्न गर्न निर्देशन समितिलाई पार्टीका तर्फबाट सम्पूर्ण जिम्मेवारी प्रदान गरिएको छ । यससँगै तरुण दलका नेताले पार्टी कार्यालय सानेपामा थालेका आमरण अनशन स्थगित भएको छ ।

हिजोको बैठकमा मोहन बस्नेतले महामन्त्री गगन थापाविरुद्ध बोलेका थिए । आफूलाई अख्तियारले मुद्दा चलाउनमा महामन्त्री थापाको हात रहेको उनले बैठकमा सार्वजनिक गरेका थिए । महामन्त्री थापाले भने फोहोर चलाएर आफू फोहोरी नहुने जवाफ फर्काएका थिए । आजको बैठकमा हिजोको जस्तै नेताहरुबीच एकअर्कामा आक्षेप लगाउने काम होला ?