काठमाडौं । संघीय मामिला तथा सामान्य प्रशासन मन्त्रालयको नेतृत्व नेकपा (एमाले) की राष्ट्रियसभा सदस्य भगवती न्यौपानेले पाएकी छन् ।

प्रधानमन्त्री केपी शर्मा ओलीकाे सिफारिसमा मंगलबार राष्ट्रपति रामचन्द्र पौडेलले न्यौपानेलाई संघीय मामिला तथा सामान्य प्रशासन मन्त्रीमा नियुक्त गर्दै जिम्मेवारी ताेकेका हुन् ।

‘नेपालको संविधानको धारा ७७ को उपधारा (२) को खण्ड (क) बमोजिम आफ्नो पदबाट सम्माननीय प्रधानमन्त्रीज्यू समक्ष राजीनामा दिनुभएकोले नेपालको संविधानको धारा ७६ को उपधारा (९) बमोजिम सम्माननीय प्रधानमन्त्रीज्यूको सिफारिसमा माननीय श्री भगवती न्यौपानेलाई मन्त्री पदमा नियुक्त गरी सङ्घीय मामिला तथा सामान्य प्रशासन मन्त्रालयको कार्यभार सम्हाल्ने गरी तोक्नु भएको छ,’राष्ट्रपति कार्यालयकी प्रवक्ता शैलजा रेग्मी भट्टराईद्वारा हस्ताक्षरित विज्ञप्तिमा भनिएको छ ।

पूर्वमन्त्री राजकुमार गुप्ताले पदबाट राजीनामा दिएपछि उक्त पदमा न्यौपानेको नियुक्ति भएको हो । गुप्ता हालै सार्वजनिक भएको घुससम्बन्धी अडियो प्रकरणमा मुछिएपछि राजीनामा दिएका थिए ।