काठमाडौं । सत्तारूढ दल नेपाली कांग्रेसले रूपन्देही–३ को उपनिर्वाचनबारे छलफल गरेको छ । शुक्रबार पार्टी सभापति शेरबहादुर देउवाको निवास बूढानीलकण्ठमा बसेको नेताहरूको बैठकमा उपनिर्वाचनमा पार्टीको रणनीति, योजनाबारे छलफल भएको पार्टीका प्रमुख सचेतक श्यामकुमार घिमिरेले जानकारी दिए ।

कात्तिक १७ गते हुन लागेको उपनिर्वाचन र त्यहाँ पार्टीको अवस्थाबारे केन्द्रित रहेर कुराकानी भएको हो । “रूपन्देहीको निर्वाचनका विषयमा छलफल गरेका छौँ । मुख्यरूपमा केन्द्रित भनेको आगामी उपनिर्वाचनमा हाम्रो रणनीति, योजनाका विषयमा छलफल भएको छ,” उनले भने ।

जिल्ला सभापति रामकृष्ण खाण, लुम्बिनी प्रदेश सभापति अम्मरसिंह पुन, केन्द्रीय सदस्य बालकृष्ण खाणले रूपन्देही ३ को अहिलेको वस्तुगत स्थितिबारे ब्रिफिङ गरेका थिए ।

रूपन्देही–३ मा गत निर्वाचनमा आफूहरू प्राविधिकरूपले हारे पनि जनमतको अवस्था मजबुत रहेको उनको भनाइ छ ।

“रूपन्देहीमा हामीले हेर्ने भनेको विभिन्न गठबन्धन थिए, गत निर्वाचनमा । ०७९ को निर्वाचनमा विभिन्न गठबन्धनबाट चुनाव लडिएको थियो । गठबन्धनलाई पर राखेर समानुपातिक मत पार्टीको हेर्दा कांग्रेस पहिलो पार्टीकै रूपमा थियो । २० हजार मत प्राप्त गरेको थियो । दोस्रो पार्टी एमाले १६ हजार र तेस्रो पार्टी रास्वपा १४ हजार मत थियो । त्यसपछि क्रमशः मधेसवादी दलहरू थिए,” घिमिरेले भने ।

उनले अगाडि थपे, “अहिलेको पोजिसन के छ भनेर ठ्याक्कै भन्न त गाह्रो छ । विश्लेषण गरेर हेर्दा कांग्रेस, एमाले, रास्वपा र मधेसकेन्द्रित दलहरू एक भएर लड्ने भन्ने चर्चा पनि आएको छ । कांग्रेस नै पहिलो पार्टी हो । त्यो निर्वाचनमा प्राविधिकरूपले चुनाव हारेका हौँ । स्थानीय निर्वाचनमा पनि हामी पहिलो पार्टी हो । हाम्रो भोटको अवस्था मजबुत छ ।”

उनका अनुसार, बैठकमा मन्त्री हेरफेर गर्ने विषयले प्रवेश नै पाएन ।

२०७९ को चुनावमा कांग्रेसबाट उम्मेदवार रहेका खाण राप्रपा उम्मेदवार दीपक बोहरासँग पराजित भएका थिए । बोहराको निधन भएपछि रिक्त पदमा उपनिर्वाचन हुन लागेको हो ।

२०७९ मंसिरको प्रतिनिधि सभा निर्वाचनमा रूपन्देही–३ मा समानुपातिकतर्फ नेपाली कांग्रेस पहिलो थियो । उसले २० हजार २७९ मत प्राप्त गरेको थियो ।

दोस्रो स्थानको एमालेले १६ हजार ९८६ मत प्राप्त गरेको थियो । तेस्रो मत ल्याएको रास्वपाले १४ हजार १५४ मत ल्याएको थियो ।