काठमाडौं । प्रमुख प्रतिपक्षी दल नेकपा (माओवादी केन्द्र) का सांसद अमनलाल मोदीलाई प्रतिनिधिसभाको आकस्मिक समयमा बोल्दाबोल्दै सभामुख देवराज घिमिरेले रोकेका छन् ।

बुधवार प्रतिनिधिसभा बैठकको आकस्मिक समयमा बोल्दा मोदीले नीतिगत विषयमा प्रवेश गरी सरकारको आलोचना गर्न थालेपछि सभामुखले रोकेका हुन् ।

मुलुकमा तत्काल भएका घटनाहरूबारे बोल्नका लागि भनेर आकस्मिक समयको व्यवस्था गरिए पनि मोदीले हाजिरी जवाफमा अहिलेसम्मको सेटिङ र कान्डैकान्डमा चलेको सरकार कुन हो भनेर सोधियो भने अहिलेको सरकार देखिन्छ भन्दै व्यङ्ग्य गरेका थिए ।

त्यसपछि सभामुख घिमिरेले यस्ता विषय आकस्मिक समयको नरहेको बताएका हुन् । मोदीले कुलिङ पिरियड, मन्त्रीहरूको आर्थिक लेनदेन, भिजिट भिसा, किसानहरूलाई मल खातलगायतका घटनामा सरकार चुकेको मोदीले बताएका थिए ।

त्यसपछि सभामुखले यी विषय नीतिगत विषय भएकाले उनलाई बस्न आग्रह गरे । तर, मोदीले भ्रष्टाचारको विषय भएकाले त्यसका बारेमा आवाज उठाउनु स्वाभाविक रहेको बताउँदै आफ्नो भनाइ टुङ्ग्याएर आसनमा बसे ।