काठमाडौं । सरकारले त्रिदेशीय भूमिमा लिपुलेक भएर भारत र चीनले व्यापारिक नाका सञ्चालन गर्न लागेको विषयमा प्रधानमन्त्री केपी ओलीको भारत भ्रमणका क्रममा पनि आपत्ति जनाउने तयारी गरेका छन् । ओली चीन भ्रमणबाट बुधबार राति स्वदेश फर्किएका छन् ।

उनी यही महिनाको अन्तिममा भारत भ्रमणमा जाँदैछन् । चीन भ्रमणका क्रममा ओलीले राष्ट्रपति सी जिनफिङलाई भेटेका थिए । त्यस क्रममा उनले लिपुलेक, कालापानी र लिम्पियाधुरा नेपाली भूमि भएको भन्दै चीन र भारतले गरेको व्यापारिक सम्झौताप्रति आपत्ति जनाएको परराष्ट्रसचिव अमृतबहादुर राईले पत्रकार सम्मेलन गरी जानकारी दिएका छन् ।

पत्रकार सम्मेलनमा परराष्ट्रसचिव राईले ओलीको चीन भ्रमण सफल भएको बताए । चिनियाँ राष्ट्रपति सीले एक चीन नीतिप्रतिको नेपालको प्रतिबद्धताको प्रशंसा गरेको उल्लेख गरे । सञ्चारकर्मीले लिपुलेकबारे चिनियाँ नेतृत्वसँग जस्तै भारत भ्रमणका क्रममा पनि ओलीले धारणा राख्लान् त भन्ने प्रश्न सोधेका थिए ।

जवाफमा राईले त्यही शैलीमा सरकार प्रस्तुत हुने बताए । उनले नेपाल सधैं आफ्नो प्राथमिकतामा स्पष्ट रहेको उल्लेख गरे । ‘नेपालले जहिल्यै पनि प्राथमिकता र अडान सधैं तयारीका साथ राखेको हुन्छ’ परराष्ट्रसचिव राईले भने ‘हामी सधैँ आफ्नो परराष्ट्र नीतिको आधारभूत सिद्धान्तमा आफ्नो नीति अनुसार अघि बढ्छौं ।’