काठमाडौं । नेपाली कांग्रेसका सांसद रामहरि खतिवडाले संविधान र नेपाल मात्रै जल्नु बाँकी भएकाेले त्याे जल्न नहुने बताएका छन् ।

संविधानको परिधिभित्रै रहेर सरकार निर्माण गर्नुपर्ने भन्दै उनले देशमा सबै जल्दा बाँकी रहेका संविधान र नेपाल जल्न नहुने बताएका हुन् ।

उनले सामाजिक सञ्जालमार्फत भनेका छन्, ‘संसद् भवन जल्यो, सिंहदरबार जल्यो, सर्वोच्च अदालत र अदालतहरू जले, राष्ट्रपति कार्यालय जल्यो, राष्ट्रपति निवास पनि जल्यो । प्रधानमन्त्री कार्यालय र निवास जल्यो । धेरै संरचना जले । अब देशमा भएको संविधान नजलोस्, नेपाल नजलोस् । संविधान अनुसार सरकार बनोस् ।’

भदौ २३ र २४ गते भएका घटनाप्रति दुःख व्यक्त गर्दै खतिवडाले घटनाको छानबिन गरी दोषीलाई कारबाहीबाट उम्किन दिन नहुने पनि बताएका छन् ।