काठमाडौं । नेपालका लागि जापानका राजदूत माएदा तोरुले बुधवार प्रधानमन्त्री सुशीला कार्कीसँग शिष्टाचार भेटवार्ता गरेका छन् ।

सिंहदरबारस्थित प्रधानमन्त्री कार्यालयमा भएको भेटका क्रममा नेपाल र जापानबिचको दीर्घकालीन मित्रता, आपसी सहयोग र पारस्परिक हितका विषयमा छलफल भएको परराष्ट्र मन्त्रालयले जनाएको छ ।

दुवै देशबिच आर्थिक सहयोग, पूर्वाधार विकास, मानव स्रोत क्षमता अभिवृद्धि र सांस्कृतिक आदान–प्रदानका क्षेत्रमा सहयोगका कार्यक्रमहरूलाई अझ सुदृढ बनाउने विषयमा पनि विचार–विमर्श भएको परराष्ट्र मन्त्रालयले जनाएको छ ।

प्रधानमन्त्री कार्कीले जापान सरकारद्वारा नेपालमा प्रदान गरिएको निरन्तर सहयोगप्रति धन्यवाद ज्ञापन गर्दै दुवै देशबिचको सम्बन्धलाई आगामी दिनमा थप सुदृढ बनाउँदै लैजाने प्रतिबद्धता व्यक्त गरेको बताइएको छ ।