अमेरिकी राष्ट्रपति डोनाल्ड ट्रम्प प्रशासनले एक अमेरिकी कूटनीतिज्ञलाई चिनियाँ महिलासँगको प्रेमसम्बन्ध लुकाएको आरोपमा बर्खास्त गरेको छ । अमेरिकी विदेश मन्त्रालयका प्रवक्ता टोमी पिगोटले ती अधिकारीले ‘चिनियाँ कम्युनिस्ट पार्टीसँग सम्बन्धित एक चिनियाँ महिलासँगको प्रेमसम्बन्ध लुकाएको स्वीकार गरेपछि’ सेवाबाट हटाइएको जानकारी दिएका छन् ।

विदेश मन्त्रालयले बर्खास्त अधिकारीको नाम सार्वजनिक गरेको छैन । मन्त्रालयका अनुसार,भिडियो बयानमा ती चिनियाँ महिलाबारे बताउँदै अमेरिकी कूटनीतिज्ञले भनेका छन्, ‘उनी जासुस पनि हुन सक्थिन् ।’ तर त्यसको ठोस प्रमाण भने सार्वजनिक गरिएको छैन ।

ट्रम्पले दोस्रो कार्यकाल सम्हालेपछि जारी गरेको कार्यकारी आदेश अन्तर्गतको यो पहिलो बर्खास्ती हो । यसअघि अमेरिकाले चीनमा कार्यरत आफ्ना कर्मचारीलाई स्थानीय नागरिकहरूसँग प्रेमसम्बन्ध राख्न रोक लगाउने नीति घोषणा गरेको थियो ।