काठमाडौं । नेपाली कांग्रेसका सभापति शेरबहादुर देउवा भृकुटीमण्डपमा जारी ‘विशेष महाधिवेशन’को बन्दसत्रमा सहभागी हुने भनी सामाजिक सञ्जालमा फैलाइएको चर्चाको उनको सचिवालयले औपचारिक खण्डन गरेको छ । सभापति देउवाका स्वकीय सचिव भानु देउवाले सोमबार एक प्रेस नोट जारी गर्दै उक्त कार्यक्रममा सभापति सहभागी हुने कुनै पनि कार्यतालिका नरहेको स्पष्ट पारेका हुन् ।

केही व्यक्तिहरूले राजनीतिक स्वार्थका लागि सामाजिक सञ्जालमार्फत भ्रामक सूचना प्रवाह गरेको सचिवालयको ठहर छ । ‘केही व्यक्तिहरूले भ्रम फैलाउने उद्देश्यले नेपाली कांग्रेसका सभापति एवं पूर्वप्रधानमन्त्री शेरबहादुर देउवा आज भृकुटीमण्डप जानुहुने भनी गलत सूचना सम्प्रेषण गरेकोमा सचिवालयको गम्भीर ध्यानाकर्षण भएको छ,’ स्वकीय सचिव देउवाद्वारा जारी स्पष्टीकरणमा भनिएको छ, ‘उक्त कार्यक्रममा सभापतिज्यू जाने कुनै पनि कार्यक्रम नरहेको व्यहोरा स्पष्ट पार्न चाहन्छौं ।’