काठमाडौँ । प्रतिनिधि सभा निर्वाचनको मतदान मिति नजिकिँदै जाँदा प्रमुख राजनीतिक दलका केही शीर्ष नेताहरू आफ्नो उम्मेदवारी दिएको क्षेत्रमा मत हाल्न नपाउने भएका छन् । उनीहरू स्थायी बसोबास वा मतदाता नामावली रहेको स्थानबाट मतदान गर्ने कार्यक्रम अनुसार अघि बढेका छन्।

गगन थापा यसपटक सर्लाही-४बाट प्रतिस्पर्धामा छन्। अघिल्ला निर्वाचनहरूमा काठमाडौँ-४बाट निर्वाचित हुँदै आएका थापाले यसपटक आफ्नो मत भने काठमाडौँस्थित मैतीदेवी मयूरकुण्ड मतदान केन्द्रबाट प्रयोग गर्ने जनाइएको छ।

त्यसैगरी रवि लामिछाने चितवन-२बाट उम्मेदवार छन्। उनको सचिवालयका अनुसार उनले काठमाडौँको चुच्चेपाटीस्थित उपत्यका खानेपानी लिमिटेड परिसरमा रहेको महाँकाल मतदान केन्द्रबाट मताधिकार प्रयोग गर्नेछन्।

बालेन साह, जसलाई राष्ट्रिय स्वतन्त्र पार्टीले भावी प्रधानमन्त्रीका रूपमा अघि सारेको छ, झापा-५बाट चुनावी मैदानमा छन्। उनले भने काठमाडौँ महानगरपालिका-९, तीनकुने गैरीगाउँस्थित अन्नपूर्ण विद्यालय मतदान केन्द्रबाट मतदान गर्ने कार्यक्रम तय भएको छ।

केपी शर्मा ओली यसपटक पनि झापा-५बाट उम्मेदवार छन्। विगतमा सोही क्षेत्रबाट निर्वाचित हुँदै आएका ओलीले भने भक्तपुरको सूर्यविनायक नगरपालिका-२, बालकोटस्थित महेन्द्र शान्ति माध्यमिक विद्यालय मतदान केन्द्रबाट मत हाल्नेछन्।

त्यस्तै, पुष्पकमल दाहाल रुकुम पूर्वबाट उम्मेदवार छन्। उनले चितवनको भरतपुर महानगरपालिका-१४, शान्तिपुरस्थित नेपाल प्रहरी विद्यालय मतदान केन्द्रबाट मताधिकार प्रयोग गर्ने कार्यक्रम रहेको छ। यसैबीच रेनु दाहाल चितवन-३मा उम्मेदवारका रूपमा प्रतिस्पर्धामा छिन्।

मतदान सम्पन्न गरेपछि दाहाल रुकुम पूर्वतर्फ प्रस्थान गर्ने तयारी रहेको उनको सचिवालयले जनाएको छ। निर्वाचन व्यवस्थापनका दृष्टिले मतदाता नामावली र स्थायी बसोबास फरक स्थानमा रहेकाले केही उम्मेदवारहरू आफ्नो निर्वाचन क्षेत्रमा मत हाल्न नपाउने अवस्था देखिएको हो।