काठमाडौँ। राष्ट्रिय स्वतन्त्र पार्टी (रास्वपा)का सभापति रवि लामिछाने सम्पत्ति शुद्धीकरणसम्बन्धी मुद्दामा दायर रिट निवेदनमाथि सर्वोच्च अदालतमा भएको सुनुवाइ दोस्रो दिन पनि टुंगोमा पुग्न नसकेपछि ‘हेर्दाहेर्दै’मा राखिएको छ।

सम्पत्ति शुद्धीकरण र संगठित अपराधसम्बन्धी अभियोगपत्र परिमार्जन गर्ने महान्यायाधिवक्ता सविता भण्डारीको निर्णयविरुद्ध दायर रिटमा न्यायाधीशद्वय शारंगा सुवेदी र सुनिलकुमार पोखरेलको संयुक्त इजलासमा सुनुवाइ भइरहेको छ।

सुनुवाइका क्रममा रिट निवेदक तथा सरकारी पक्षका कानुन व्यवसायीको बहस सम्पन्न भए पनि लामिछानेका तर्फबाट हुने थप बहस र रिट निवेदकको जवाफी बहसका लागि समय नपुगेपछि मुद्दालाई मंगलबारका लागि सारिएको हो।

यसअघि आइतबार महान्यायाधिवक्ता भण्डारी स्वयंले अदालतमा उपस्थित भएर बहस गरेकी थिइन्। सोमबार भने सरकारका तर्फबाट नायब महान्यायाधिवक्ताहरू सञ्जीवराज रेग्मी, लोकराज पराजुली, खेमराज ज्ञवाली र उद्धवराज पुडासैनीलगायतले कानुनी तर्क प्रस्तुत गरेका थिए।

लामिछानेका पक्षबाट वरिष्ठ अधिवक्ता सुशील पन्त, रमण श्रेष्ठ तथा अधिवक्ता दिपेन्द्र झालगायतले वकालतनामा दर्ता गराएका छन्। समय अभावका कारण बाँकी बहस आगामी दिनमा जारी रहने अदालतले जनाएको छ।