काठमाडौँ । गृहमन्त्री सुधन गुरुङले आफ्नो सम्पत्ति विवरणका विषयमा सार्वजनिक रूपमा उठाइएका प्रश्न र टिप्पणीबारे स्पष्टीकरण दिँदै तथ्यहीन धारणा नफैलाउन आग्रह गरेका छन् ।

संघीय संसद् सचिवालय परिसरमा सञ्चारकर्मीहरूसँग कुराकानी गर्दै उनले सम्पत्तिसम्बन्धी विवरणबारे आएको चर्चा गलत व्याख्यामा आधारित रहेको दाबी गरे ।

उनका अनुसार सार्वजनिक विवरणमा देखिएको सम्पत्ति पारिवारिक रूपमा हजुरबुवाको पालादेखि रहँदै आएको र हालसम्म कानुनी रूपमा अंशबण्डा नटुंगिएको अवस्थाको भएकाले त्यसैअनुसार अभिलेखमा समावेश गरिएको हो ।

गुरुङले अविभाजित पारिवारिक सम्पत्तिलाई प्रचलित कानुनी प्रक्रिया अनुसार नै विवरणमा उल्लेख गरिएको स्पष्ट पार्दै यस विषयलाई अनावश्यक विवादमा नतान्न आग्रह गरे ।

सार्वजनिक पदमा रहेकाले पारदर्शिताप्रति आफू पूर्ण रूपमा प्रतिबद्ध रहेको उल्लेख गर्दै उनले समाचार सम्प्रेषण गर्दा तथ्य र प्रमाणमा आधारित भएर मात्र अघि बढ्न सञ्चार माध्यमलाई सुझाव दिए । साथै, पैतृक सम्पत्तिसम्बन्धी विषयलाई लिएर गलत बुझाइ सिर्जना नगर्न पनि उनले आग्रह गरेका छन् ।