काठमाडौं । मन्त्रिपरिषद् बैठक आज बस्दैछ । प्रधानमन्त्री वालेन्द्र शाह (बालेन)ले आज मध्याह्न १२ बजेका लागि बैठक बोलाएका हुन् ।

बैठक सिंहदरबारस्थित प्रधानमन्त्री तथा मन्त्रिपरिषद्को कार्यालयमा बस्नेछ । आजको बैठकले सशस्त्र प्रहरी बल नेपालको प्रहरी महानिरीक्षक (आइजीपी) नियुक्त गर्न सक्ने बताइएको छ । वर्तमान प्रमुख राजु अर्यालको चारवर्षे कार्यकाल वैशाख १८ गते सकिनुअघि नै नयाँ नेतृत्व चयन गर्ने तयारी अघि बढाइएको हो ।

महानिरीक्षक पदका लागि एआईजीद्वय नारायणदत्त पौडेल र वंशिधर दाहालबीच प्रतिस्पर्धा रहेको छ । पौडेल दाहालभन्दा करिब पाँच महिना अघि एआईजीमा बढुवा भएकाले उनी अगाडि देखिएको बताइएको छ । यद्यपि सरकारले उपयुक्त ठानेको व्यक्तिलाई आइजीपी नियुक्त गर्न सक्नेछ ।

यससँगै बैठकमा मन्त्रालयहरूको नियमित प्रस्तावहरूमाथि छलफल तथा निर्णय हुने सम्भावना रहेको छ ।