काठमाडौँ । जिल्ला प्रशासन कार्यालय काठमाडौँले नदी किनार तथा सार्वजनिक प्रयोजनका जग्गामा बनेका अनधिकृत बस्ती र संरचना तत्काल खाली गर्न निर्देशन दिएको छ। प्रशासनले शुक्रबार साँझ ७ बजेसम्म स्थान खाली नगरे संयुक्त रूपमा हटाउने कारबाही अघि बढाइने जनाएको हो।

कार्यालयका सहायक प्रमुख जिल्ला अधिकारी तथा प्रवक्ता मुक्तिराम रिजालद्वारा जारी सूचनामा सरकारी, सार्वजनिक तथा पर्ती जग्गामा निर्माण गरिएका घर टहरा हटाउन सम्बन्धित व्यक्तिलाई आग्रह गरिएको छ।

तोकिएको समय सीमाभित्र स्थान खाली नगरिए स्थानीय प्रशासन, नेपाल प्रहरी र काठमाडौँ महानगरपालिकाको समन्वयमा संरचना हटाइने उल्लेख गरिएको छ।

प्रशासनले कारबाहीका क्रममा भत्काइने संरचना वा त्यसबाट हुने व्यक्तिगत सम्पत्तिको क्षतिप्रति सम्बन्धित व्यक्तिहरू स्वयं जिम्मेवार रहने स्पष्ट पारेको छ।

सूचनामा नदीको प्राकृतिक बहाव अवरुद्ध हुने, सार्वजनिक आवागमनमा असर पर्ने तथा सहरी पूर्वाधार निर्माणमा बाधा पुग्ने गरी लामो समयदेखि बसोबास गर्दै आएका घर टहरा हटाउन लागिएको जनाइएको छ।

यस्ता संरचनामा बसोबास गर्ने, भाडामा बस्ने वा व्यापारिक गतिविधि सञ्चालन गर्ने सबैलाई समयमै स्थान खाली गर्न प्रशासनले आग्रह गरेको छ।