काठमाडौँ । राष्ट्रपति रामचन्द्र पौडेलले समाजका वरिष्ठ नागरिकको ज्ञान र सीपबाट नयाँ पुस्ताले लाभ लिन सक्नुपर्ने बताएका छन्।

शनिबार मनमोहन स्मृति प्रतिष्ठानले काठमाडौँमा आयोजना गरेको ज्येष्ठ नागरिक अन्तर्राष्ट्रिय सम्मेलनमा राष्ट्रपति पौडेलले ज्येष्ठ नागरिकले गरेका काम, कारबाहीका असल अभ्यासलाई पाठ्यक्रम अथवा अन्तर्क्रियामार्फत नयाँ पुस्ताले लाभ लिन सक्नुपर्ने बताएका हुन्। दीर्घकालीन सोचका साथ परिपक्व नीति र व्यावहारिक कार्य योजना बनाएर कदम चाल्न सरकारलगायत सबैलाई उनले सुझाव दिएका छन् ।

उनले युवा तथा कामदार जनशक्तिलाई स्वदेशमै इच्छाइएको रोजगारी प्रदान गर्न देशमा चुनौती रहेको स्थितिमा ज्येष्ठ नागरिकहरूको प्रभावकारी तथा उत्पादनमूलक व्यवस्थापनका लागि अन्य देशबाट नेपालले पनि सिक्ने अवसर हुने धारणा राखे।

स्वास्थ्यकर सामग्री खानु, लाउनु र आवश्यक परेका अवस्थामा स्वास्थ्य उपचार सेवा पाउनु ज्येष्ठ नागरिकको हक भएको उनको भनाइ थियो। दक्षिण एसियामै वामपन्थी राजनीतिका प्रथम निर्वाचित प्रधानमन्त्री मनमोहन अधिकारी सरल र सादगी नेता भएको उनको भनाइ थियो।

राष्ट्रपति पौडेलले मनमोहन नेतृत्वको सरकारले वृद्धावस्थामा पुगेका नागरिकलाई नेपालमा पहिलो पटक मासिक वृद्ध भत्ताको व्यवस्था गरेको स्मरण गरे।