काठमाडौँ । कांग्रेस सुदूरपश्चिम प्रदेश कार्यसमितिले आयोजना गरेको प्रदेशस्तरीय भेलामा संस्थापन इतर समूहका नेता–कार्यकर्ताको बाक्लो सङ्ख्यामा सहभागि भएका छन ।

प्रदेश सभापति वीरबहादुर बलायरको अध्यक्षतामा धनगढीस्थित सौराई स्क्वायरमा सुरु भएको भेलामा ‘नेपाली कांग्रेसको बृहत्तर एकता र पुनर्जागरणका लागि सुदूरपश्चिम प्रदेशस्तरीय भेला’ शीर्षकको ब्यानर राखिएको छ ।

भेलामा कांग्रेसका नेता रमेश लेखक, एनपी साउद, वीरबहादुर बलायर, मोहन बस्नेत, केदार कार्कीलगायत नेताहरू सहभागी रहेका छन । यस्तै सुदूरपश्चिम प्रदेशका मुख्यमन्त्री कमलबहादुर शाहसहित , आर्थिक मामिला मन्त्री बहादुरसिंह थापा, उद्योग, पर्यटन, वन तथा वातावरण मन्त्री शिवराज भट्ट, सामाजिक विकास मन्त्री मेघराज खड्का, राष्ट्रियसभा सदस्य तथा कैलाली सभापति नारायणदत्त भट्ट लगायतका नेताहरू उपस्थित छन् ।

यसअघि कार्यक्रममा अन्य प्रदेशका नेताहरूलाई आमन्त्रण नगरिने बताइएको थियो । तर अहिले विभिन्न प्रदेशका नेताहरूको उपस्थिति देखिएको छ ।

कार्यक्रममा बोल्ने अधिकांश वक्ताहरूले आफूहरू पार्टी विभाजनको पक्षमा नरहेको स्पष्ट पार्दै कांग्रेस नेतृत्वले सबै पक्षलाई समेटेर अघि बढ्नुपर्ने बताएका छन् । उनीहरूले पार्टीभित्र संवाद, सहकार्य र एकताको आवश्यकता औंल्याएका थिए ।