काठमाडौँ । राष्ट्रिय स्वतन्त्र पार्टी (रास्वपा)का सभापति रवि लामिछानेले पार्टीको पहिलो महाधिवेशनलाई नेतृत्व चयनको प्रक्रिया मात्र नभई पार्टीको दीर्घकालीन जीवन, विधि–पद्धति र स्वस्थ राजनीतिक संस्कार निर्माण गर्ने ऐतिहासिक अवसरका रूपमा लिन आग्रह गरेका छन् ।

शनिबार फेसबुकमा पोस्ट लेख्दै उनले जिल्ला अधिवेशन सुरु हुने क्रममा लामिछानेले वडा र पालिका तहका अधिवेशन सफलतापूर्वक सम्पन्न भइसकेको उल्लेख गर्दै २३ र २४ जेठमा जिल्ला अधिवेशनहरू सञ्चालन भइरहेको बताएका छन् ।

उनले पार्टीको सर्वोपरि हितका लागि हरेक तहमा सक्षम, इमानदार र जनमैत्री नेतृत्व आवश्यक रहेको बताउँदै संवाद, सहमति र आन्तरिक निर्वाचनजस्ता लोकतान्त्रिक विधिबाट नेतृत्व चयन गरिनुपर्नेमा जोड दिए । यस्ता प्रक्रियाले पार्टीलाई थप बलियो र परिपक्व बनाउने उनको भनाइ छ ।

लामिछानेले रास्वपालाई उन्नत लोकतान्त्रिक पार्टी बनाउने लक्ष्य लिइएको उल्लेख गर्दै त्यसका लागि विचार मात्र नभई शैली, व्यवहार र राजनीतिक संस्कार पनि उन्नत हुनुपर्ने बताए ।