काठमाडौँ । केयरगिभर पदका लागि यसअघि स्थगित गरिएको अंग्रेजी भाषा परीक्षा भोलिदेखि पुनः सुरु हुने भएको छ। विवादका कारण परीक्षा अनिश्चितकालका लागि स्थगित गरिएको भन्दै सीआईएनए इन्टरनेसनलले बिहीबारदेखि निर्धारित तालिका अनुसार परीक्षा सञ्चालन गरिने जनाएको हो।

संस्थाले सार्वजनिक गरेको सूचनाअनुसार बिहीबारदेखि तय भएका परीक्षा नियमित रूपमा सञ्चालन हुनेछन्। तर जेठ २६ र २७ गते हुन नसकेका परीक्षा भने पछि छुट्टै कार्यतालिका बनाएर सञ्चालन गरिने व्यवस्था गरिएको छ।

त्यसका लागि रोकिएका परीक्षाको नयाँ मिति तथा समय परीक्षार्थीलाई व्यक्तिगत रूपमा मोबाइल सन्देशमार्फत जानकारी गराइने जनाइएको छ।

इजरायलका दीर्घकालीन स्याहार केन्द्रहरूमा नेपाली सहायक कामदार पठाउन आधारभूत अंग्रेजी भाषा अनिवार्य गरिएको छ। सोही व्यवस्था अन्तर्गत परीक्षा सञ्चालन गर्न त्रिपुरेश्वरस्थित सीआईआईएनए केन्द्रमा परीक्षार्थी पुगेका बेला केही असन्तुष्टि देखिएपछि परीक्षा तत्कालका लागि स्थगित गरिएको थियो।

वैदेशिक रोजगार विभागले परीक्षा नरोकिनुपर्ने भन्दै निर्देशन दिएपछि हाल पुनः परीक्षा सञ्चालनको तयारी अघि बढाइएको हो।