काठमाडौँ। पूर्व प्रधानमन्त्री एवं एमाले अध्यक्ष केपी शर्मा ओलीले पार्टी उपाध्यक्ष विष्णु पौडेल र महासचिव शंकर पोखरेललाई ‘लोभीपापी’को संज्ञा दिँदै उनीहरूले पार्टी फुटाउनसक्ने दाबी गरेका छन ।

बागमती प्रदेशका नेता–कार्यकर्तासँग पुनर्गठन कार्यदलले शनिबार छलफल गरेलगत्तै अध्यक्ष ओलीले केही केन्द्रीय सदस्य, प्रदेश पदाधिकारीलाई गुण्डु बोलाएका थिए। त्यहाँ उनले मध्यरातसम्म पुनर्गठन कार्यदलको बैठकमा भएको छलफलबारे जानकारी लिएका थिए ।

नेताहरूको बिफ्रिङ सुनिसकेपछि अध्यक्ष ओली विष्णु पौडेल र महासचिव शंकर पोखरेलप्रति आक्रामक सुनिएको गुन्डू उच्च स्रोतले जानकारी दिएको छ । गुन्डु स्रोतले भन्यो, ‘ महासचिव लोभी बनेको अध्यक्ष ओलीको निष्कर्ष थियो । पुनर्गठन अभियान चलाएर उपाध्यक्ष विष्णु पौडेलले पनि पाप गरिरहेको अध्यक्षले बताउनुभयो ।’ पदमा लोभिएर महासचिव पोखरेलले उपाध्यक्ष पौडेललाई साथ दिइरहेको बताउँदै यो अभियान निष्कर्षमा नपुग्ने ओलीले बताएका थिए । ‘उनीहरू (पौडेल–पोखरेल) जसरी हुन्छ मलाई गलहत्याउने, हटाइहाल्ने अभियानमा छन् ।

उनीहरूले पार्टी नै फुटाउन पनि सक्छन्रु मलाई हटाउन त कारण चाहिएला नि ? के कारणले हटाउने ! मैले के अपराध गरेको छु र हटाउने !,’ ओलीको भनाइ उद्धृत गर्दै स्रोतले भन्यो ।

भदौ २३ र २४ गतेपछि उपाध्यक्ष विष्णु पौडेलले पार्टी, तत्कालीन सरकारको काम, नेतृत्वको बचाऊ र प्रतिरक्षामा एक शब्द पनि नखर्चेको, आफूले लेख्नुस् भनेर बारम्बार आग्रह गर्दा पनि सुनेको नसुन्यै गरेको, कतै नबोलेको र अहिले पुनर्गठनको नेतृत्व गरिरहेको भन्दै ‘पापी’ को संज्ञा दिएको अर्का एक केन्द्रीय सदस्यले बताए।