काठमाडौँ । फिफा विश्वकप-२०२६ अन्तर्गत आफ्नो पहिलो खेलमा अष्ट्रियाले जित निकाल्दै प्रतियोगिताको सुरुवात गरेको छ। अमेरिकाको क्यालिफोर्नियास्थित सान फ्रान्सिस्को बे एरिया रंगशालामा भएको खेलमा अष्ट्रियाले पहिलो पटक विश्वकपमा सहभागी जोर्डनलाई ३-१ गोल अन्तरले पराजित गरेको हो।

खेलमा अष्ट्रियाले सुरुवाती अग्रता बनाएको थियो। पहिलो हाफको २०औँ मिनेटमा रोमानो स्चमिडले गोल गर्दै टोलीलाई अघि बढाएका थिए। तर दोस्रो हाफको सुरुवातमै जोर्डनका अलि ओल्वानले गोल फर्काएपछि खेल बराबरीमा पुगेको थियो।

निर्णायक क्षण खेलको ७६औँ मिनेटमा आयो। जोर्डनका याजान अलारबबाट भएको आत्मघाती गोलसँगै अष्ट्रियाले पुनः अग्रता कायम गर्‍यो। इन्जुरी समयमा प्राप्त पेनाल्टीलाई मार्को अर्नाटोभिकले गोलमा परिणत गरेपछि अष्ट्रियाको जित सुनिश्चित भयो।

यस जितसँगै अष्ट्रियाले समूह ‘जे’ मा तीन अंक जोडेको छ। समान अंक भए पनि गोल अन्तरका आधारमा अर्जेन्टिना शीर्ष स्थानमा रहेको छ भने जोर्डन र अल्जेरियाले खाता खोल्न सकेका छैनन्।

अष्ट्रियाले विश्वकपमा यो आठौँ सहभागिता जनाएको हो। टोलीले सन् १९५४ को संस्करणमा तेस्रो स्थान हासिल गरेको इतिहास छ। लामो अन्तरालपछि विश्वकपमा फर्किएको अष्ट्रियाका लागि यो प्रतियोगिताको पुनरागमन प्रभावशाली बनेको छ। पहिलो पटक विश्वकप खेलेको जोर्डन भने सुरुवाती खेलमै पराजित हुन पुगेको छ।