काठमाडौँ । नेकपा (एमाले) का उपाध्यक्ष विष्णुप्रसाद पौडेललाई सम्पत्ति शुद्धीकरणसम्बन्धी अनुसन्धानका क्रममा पक्राउ गरिएको छ।

प्रहरी स्रोतहरूका अनुसार पौडेललाई आइतबार सुर्खेतबाट नियन्त्रणमा लिइएको हो। उनी पार्टीको कार्यक्रमका लागि सुर्खेत पुगेका बेला पक्राउ परेका हुन्। सम्पत्ति शुद्धीकरण अनुसन्धान विभागले सेयर कारोबार तथा सम्पत्तिको स्रोतसम्बन्धी विषयमा अनुसन्धान गरिरहेको क्रममा उनलाई नियन्त्रणमा लिइएको बताइएको छ। विभागले हाल घटनाबारे औपचारिक विवरण सार्वजनिक गरेको छैन।

स्रोतका अनुसार पौडेललाई कार्यक्रम स्थलबाटै नियन्त्रणमा लिएर जिल्ला प्रहरी कार्यालयमा राखिएको छ। उनलाई थप अनुसन्धानका लागि काठमाडौँ ल्याउने तयारी भइरहेको जनाइएको छ।

अनुसन्धानसँग सम्बन्धित उच्च स्रोतले उनको नाममा रहेका सम्पत्ति तथा वित्तीय कारोबारको स्रोतबारे छानबिन भइरहेको जनाएको छ। यद्यपि अनुसन्धानका विषयमा विभागले आधिकारिक धारणा सार्वजनिक गरिसकेको छैन।

पौडेल पूर्वउपप्रधानमन्त्री तथा अर्थमन्त्रीसमेत हुन्। उनी एमालेको केन्द्रीय नेतृत्वमा रहेका वरिष्ठ नेतामध्ये एक मानिन्छन्। यस विषयमा एमालेले भने औपचारिक प्रतिक्रिया सार्वजनिक गरेको छैन। पक्राउ र अनुसन्धानबारे विभाग तथा सम्बन्धित निकायबाट थप विवरण आउन बाँकी रहेको छ।

पौडेललाई सुर्खेतबाट नेपालगञ्ज लगियो
नेकपा एमालेका उपाध्यक्ष विष्णु पौडेललाई नेपालगञ्ज लगिएको छ । पौडेललाई सम्पत्ति शुद्धीकरण विभागको टोलीले आज सुर्खेतबाट पक्राउ गरेको थियो ।

पक्राउ परेका उनलाई केही समय जिल्ला प्रहरी कार्यालय सुर्खेतमा राखिएको थियो । पौडेललाई नेपालगञ्जबाट काठमाडौँ ल्याइनेछ । पौडेल सुर्खेतमा एमालेको निर्वाचन समीक्षा तथा पुनर्गठन कार्यक्रममा सहभागी भइरहँदा पक्राउ परेका हुन ।

उक्त कार्यक्रममा एमालेका अन्य शीर्ष नेताहरू शंकर पोखरेल, पृथ्वी सुब्बा गुरुङ, छविलाल विश्वकर्मा र बादल लगायतको पनि उपस्थिति थियो ।