काठमाडौँ । नेपाली कम्युनिष्ट पार्टी (नेकपा)का संयोजक पुष्पकमल दाहाल ‘प्रचण्ड’ले वामपन्थी शक्तिहरूबीच यथाशीघ्र सहकार्यको प्रक्रिया अघि बढाउनुपर्ने आवश्यकता औँल्याएका छन्। उनले सहकार्यमा अनावश्यक विलम्ब भए मुलुकले गम्भीर राजनीतिक चुनौती सामना गर्नुपर्ने चेतावनी दिएका छन्।

जननेता मदन भण्डारीको स्मृतिमा आयोजित कार्यक्रममा सम्बोधन गर्दै ‘प्रचण्ड’ले नेपालमा कम्युनिष्ट आन्दोलनलाई कमजोर बनाउने प्रयास भइरहेको दाबी गरे। भारतमा कम्युनिष्ट आन्दोलन कमजोर पारिएको प्रसंग उल्लेख गर्दै उनले नेपालमा पनि त्यस्तै उद्देश्यसहित विभिन्न गतिविधि भइरहेको आफ्नो धारणा व्यक्त गरे।

उनले पछिल्ला राजनीतिक घटनाक्रम र निर्वाचनपछिको अवस्थालाई त्यसैको परिणामका रूपमा व्याख्या गर्दै राष्ट्रिय स्वाधीनताको संरक्षण, निरंकुश प्रवृत्ति, फासिवादी सोच तथा वैदेशिक दबाबको प्रतिरोधका लागि वामपन्थी र देशभक्त शक्तिहरूबीच छिटो सहकार्य आवश्यक रहेको बताए।

‘प्रचण्ड’ले आफ्नो प्रस्ताव तत्काल पार्टी एकीकरणका लागि नभई सहकार्यका लागि भएको स्पष्ट पारे। संसद्, सडक तथा निर्वाचनजस्ता राजनीतिक गतिविधिमा साझा रूपमा अघि बढ्न सकिने उल्लेख गर्दै उनले परिस्थितिअनुसार सहकार्यको प्रक्रिया तत्काल सुरु गर्नुपर्ने धारणा राखे।

सहकार्यको निर्णयलाई अनावश्यक रूपमा पछाडि धकेल्ने प्रवृत्ति उपयुक्त नहुने उल्लेख गर्दै उनले समयमै राजनीतिक समझदारी निर्माण गर्न नसकिए त्यसले मुलुकका लागि नकारात्मक परिणाम निम्त्याउन सक्ने चेतावनी दिए।