काठमाडौँ । कास्कीको पोखरा महानगरपालिका-१७ स्थित मुस्ताङचोकमा विद्यालयको भ्यान दुर्घटना हुँदा दुई विद्यार्थी सामान्य घाइते भएका छन्। घटनामा संलग्न चालकलाई प्रहरीले नियन्त्रणमा लिएर अनुसन्धान अघि बढाएको जनाएको छ।

प्रहरीका अनुसार हेप्पी बोर्डिङ स्कुलको ग १ क ६६२२ नम्बरको भ्यान सडक छेउको बिजुलीको पोलमा ठोक्किएपछि दुर्घटना भएको हो।

दुर्घटनामा पोखरा महानगरपालिका-६, दिगोपाटन निवासी १६ वर्षीय अमृत परियारको बायाँ खुट्टामा तथा पोखरा महानगरपालिका-१८, सेदी निवासी १६ वर्षीय अंकित कुँवरको दायाँ हात र खुट्टामा सामान्य चोट लागेको प्रहरीले जनाएको छ।

घाइते दुवै विद्यार्थीलाई उपचारका लागि नमस्ते अस्पतालमा भर्ना गरिएको छ। उनीहरूको उपचार जारी रहेको जनाइएको छ।

घटनापछि सम्पर्कमा नरहेका स्याङ्जाको फेदीखोला गाउँपालिका-२ निवासी ५२ वर्षीय चालक बलराम भण्डारीलाई प्रहरीले नियन्त्रणमा लिएको छ।

प्रहरीको प्रारम्भिक अनुसन्धानबाट चालकले मादक पदार्थ सेवन गरी सवारी चलाएको देखिएको जनाएको छ। घटनाका सम्बन्धमा थप अनुसन्धान भइरहेको प्रहरीले जानकारी दिएको छ।