काठमाडौँ । सम्पत्ति शुद्धीकरण अनुसन्धान विभागले पूर्वप्रधानमन्त्री शेरबहादुर देउवाका छोरा जयवीरसिंह देउवालाई ७ दिनभित्र विभागमा उपस्थित हुन सार्वजनिक सूचना जारी गरेको छ।

विभागले २०८३ असार २३ गते प्रकाशित सूचनामार्फत सम्पत्ति शुद्धीकरणसम्बन्धी कसुरको अनुसन्धानका क्रममा केही विषयमा बुझ्नुपर्ने भएकाले सूचना प्रकाशित भएको मितिले सात दिनभित्र कार्यालयमा उपस्थित हुन निर्देशन दिएको हो।

विभागका अनुसार जयवीर देउवाको स्थायी ठेगाना डडेलधुरा र हालको बसोबास बुढानीलकण्ठ नगरपालिका–२, काठमाडौँ रहेको उल्लेख गर्दै उनको निवासमा समेत हाजिर हुन आउनुपर्ने सूचना टाँस गरिएको छ।

सूचनामा ललितपुरको पुल्चोकस्थित कर्मचारी सञ्चय कोष भवनमा रहेको विभागको कार्यालयमा कार्यालय समयभित्र उपस्थित भई आवश्यक बयान तथा जानकारी उपलब्ध गराउन भनिएको छ। तोकिएको अवधिभित्र उपस्थित नभए प्रचलित कानुनबमोजिम कारबाही हुने चेतावनीसमेत सूचनामा उल्लेख छ।

विभागले अनुसन्धानको विषयवस्तु वा अनुसन्धानसँग सम्बन्धित आरोपबारे भने कुनै थप विवरण सार्वजनिक गरेको छैन।

यसअघि यही अनुसन्धानका सिलसिलामा विभागले जयवीरका बुबा शेरबहादुर देउवा र आमा आरजु राणा देउवालाई पनि उपस्थित हुन बोलाएको थियो। उनीहरूले विभागलाई साउन मसान्तसम्म उपस्थित हुने जानकारी गराएको स्रोतले जनाएको छ।