काठमाडौं । कांग्रेसका नेता ड. शशांक कोइरालाले पार्टीका निर्वतमान सभापति एवं पूर्वप्रधानमन्त्री शेरबहादुर देउवा स्वदेश फर्किंदा धरपकड भए पार्टीले कडा प्रतिवाद गर्ने चेतावनी दिएका छन ।

शुक्रबार चुनदेवीस्थित सम्पर्क कार्यालयमा आयोजित पत्रकार सम्मेलनमा राष्ट्रिय भेलाको तयारीबारे जानकारी दिँदै कोइरालाले साउन २९ देखि ३१ गतेसम्म हुने भेलामा देउवा पनि सहभागी हुने बताएका हुन । देउवा साउन २६ गते स्वदेश फर्किने कार्यक्रम रहेको उनले जानकारी दिएका छन ।

देउवालाई सरकारले धरपकड गर्न सक्ने सम्भावनाबारे सञ्चारकर्मीले सोधेको प्रश्नमा कोइरालाले त्यस्तो अवस्था आउने सम्भावना नरहेको बताए ।

तर, धरपकड गरिए पार्टीले त्यसको कडा प्रतिवाद गर्ने उनले चेतावनी दिएका छन । पार्टीको आधिकारिकतासम्बन्धी मुद्दामा सर्वोच्च अदालतले पुनरावलोकनको अनुमति दिएकोप्रति खुशी व्यक्त गर्दै कोइरालाले अदालतको पछिल्लो आदेशको स्वागत गरे ।

देउवाको तर्फबाट दायर न्यायिक पुनरावलोकनको निवेदनमा सर्वोच्च अदालतले साउन २१ गते पुनरावलोकनका लागि अनुमति दिएको थियो । अदालतको निर्णयले आगामी न्याय निरूपणबाट कांग्रेसले न्याय पाउने विश्वास थप बलियो भएको कोइरालाले बताए ।

सर्वोच्चको पछिल्लो निर्णयले राष्ट्रिय भेलाको कार्यदिशामा कुनै परिवर्तन नल्याउने बरु कांग्रेसका नेता–कार्यकर्तामा थप उत्साह पैदा गरेको उनले बताए ।

उनले भने, ‘मुलुकको वर्तमान राजनीतिक परिस्थितिमा पार्टीलाई वैचारिक र सांगठनिक रूपमा एकताबद्ध बनाउन यो भेला कोशेढुंगा सावित हुनेछ ।’ यसअघि भेलामा १० देखि २० हजारसम्मको सहभागिता हुने अनुमान गरिएको थियो ।

तर सर्वोच्च अदालतको पछिल्लो निर्णयपछि पार्टी पंक्तिमा सकारात्मक सन्देश गएको र भेलामा अपेक्षाभन्दा उल्लेख्य सहभागिता हुने अवस्था बनेको उनले बताएका छन ।

पत्रकारहरूले पूर्वकार्यवाहक सभापति पूर्णबहादुर खड्का र नेता डा. शेखर कोइरालाको सहभागिताबारे पनि प्रश्न गरेका थिए । जवाफमा कोइरालाले खड्का अस्वस्थ रहेका र शेखर कोइराला विराटनगरमा आफ्नै काममा व्यस्त रहेकाले भेलामा उपस्थित हुन नसक्ने बताएका छन । यद्यपि, दुवै नेताको अभियानप्रति पूर्ण समर्थन र ऐक्यबद्धता रहेको उनको दाबी थियो ।

देउवा फर्किनेबारे प्रहरीले भन्योः हामी हेर्दैछौं
पूर्व प्रधानमन्त्री एवं कांग्रेसका निवर्तमान सभापति शेरबहादुर देउवा छिटै स्वदेश फर्किने उनीनिकट नेताहरूले बताइरहेका छन् ।

गत भदौमा भएको जेनजी आन्दोलनमा गम्भीर घाइते भएका देउवा यतिबेला उपचारको क्रममा हङकङमा रहेका छन् । उनी यही साउन २६ गते साँझ स्वदेश फर्किने तालिका छ ।

देउवा फर्किने विषयमा नेपाल प्रहरीले पनि अध्ययन गरिरहेको बताएको छ । शुक्रबार प्रहरी प्रधान कार्यालयमा आयोजित पत्रकार सम्मेलनमा देउवा नेपाल फर्किनेबारे सोधिएको प्रश्नमा प्रहरी प्रवक्ता अबिनारायण काफ्ले भन्छन्, ‘हामी हेर्दैछौं। बुझ्ने काम हुँदैछ ।’