काठमाडौँ । अमेरिकी राष्ट्रपति डोनाल्ड ट्रम्पले विल शार्फलाई राष्ट्रपतिको सहायक र ह्वाइट हाउस काउन्सिल (मुख्य कानुनी सल्लाहकार) नियुक्त गर्ने घोषणा गरेका छन् । आगामी सेप्टेम्बर १ देखि लागू हुने गरी ट्रम्पले आइतबार आफ्नो सामाजिक सञ्जाल ट्रुथ सोसलमार्फत सो जानकारी दिएको हो । हाल ह्वाइट हाउसको स्टाफ सेक्रेटरीको जिम्मेवारी सम्हालिरहेका शार्फले यसअघि नेसनल क्यापिटल प्लानिङ कमिसनको अध्यक्षका रूपमा समेत सेवा गरिसक्नुभएको छ ।

नियुक्तिको घोषणा गर्दै ट्रम्पले शार्फको कार्यक्षमताको प्रशंसा गरेका छन् । शार्फसँग संघीय अभियोजन र निजी क्षेत्रमा अधिवक्ताका रूपमा काम गरेको लामो अनुभव छ । उनले दुई वटा संघीय पुनरावेदन अदालतका न्यायाधीशहरूको कानुनी सहयोगी (क्लर्क) का रूपमा समेत काम गरेका थिए । ट्रम्पकाअनुसार शार्फले बाइडेन प्रशासनको समयमा आफ्ना विरुद्ध चलाइएका विभिन्न कानुनी मुद्दाहरूमा सर्वोच्च अदालतसम्म उनको पक्षबाट प्रतिनिधित्व गरेका थिए ।

अमेरिकी सञ्चारमाध्यमहरूका अनुसार शार्फले ह्वाइट हाउसको ४० करोड डलर लागतको बलरुम परियोजना स्वीकृत गराउन महत्त्वपूर्ण भूमिका खेलेका थिए । यद्यपि, वासिङ्टन डिसीको संघीय पुनरावेदन अदालतले हालै उक्त परियोजनालाई गैर कानुनी ठहर गरेको छ र यो मुद्दा छिट्टै सर्वोच्च अदालत पुग्न सक्ने सम्भावना छ ।

शार्फले डेभिड वासिङ्टनको स्थान लिनेछन्, जो अब निजी क्षेत्रमा आबद्ध हुन लागेको ट्रम्पले उल्लेख गरेका छन् ।