काठमाडौँ । राष्ट्रिय स्वतन्त्र पार्टीका सभापति रवि लामिछानेले प्रधानमन्त्री वालेन्द्र शाहसँग आफ्नो सम्बन्धमा कुनै किसिमको असमझदारी नरहेको बताएका छन्।

बुधबार सञ्चारकर्मीसँग कुरा गर्दै लामिछानेले आफूहरूबीच सम्बन्ध बिग्रिएको भन्ने चर्चा बेलाबखत सार्वजनिक भए पनि त्यस्ता समाचारपछि सम्बन्ध थप नजिकिएको दाबी गरे। उनले प्रधानमन्त्रीसँगको सम्बन्धलाई लिएर कुनै भ्रम वा समस्या नरहेको स्पष्ट पारे।

प्रधानमन्त्री शाहले केही समयअघि सामाजिक सञ्जालमा आफू ‘एक्लो’ महसुस गरिरहेको आशयको अभिव्यक्ति दिएको विषयमा सञ्चारकर्मीले प्रश्न गरेका थिए।

जवाफमा लामिछानेले प्रधानमन्त्री शाह कवि तथा कलाकारसमेत भएकाले उनका अभिव्यक्तिलाई प्रत्येक शब्दको राजनीतिक अर्थ खोजेर हेर्न नहुने बताए।

ठूलो भीडबीच रहेर पनि व्यक्तिले एक्लोपन महसुस गर्न सक्ने प्रसंग उल्लेख गर्दै उनले उक्त अभिव्यक्तिबाट आफूले कुनै राजनीतिक चिन्ता नलिएको बताएका छन्।