काठमाडौं । अविरल वर्षा, बाढी र पहिरोका कारण देशका विभिन्न प्रदेशका मुख्य सडक खण्डहरू पूर्ण रूपमा अवरुद्ध भएका छन्। नेपाल प्रहरीले बुधबार बिहान ६:३० बजेसम्मको अध्यावधिक विवरण सार्वजनिक गर्दै यात्रुहरूलाई सचेत रहन र वैकल्पिक मार्गको प्रयोग गर्न अनुरोध गरेको छ।

बाढी र पहिरोको उच्च जोखिमका कारण बीपी राजमार्गको खुर्कोट–नेपालथोक–कटुन्जेबेँसी खण्डमा रात्रिकालीन सवारी सञ्चालनमा रोक लगाइएको छ। प्रहरीका अनुसार उक्त खण्डमा साँझ ६ बजेदेखि बिहान ४ बजेसम्म सवारी साधन चलाउन पाइने छैन भने दिउँसोको समयमा पनि परिस्थितिको मूल्यांकन गरेर मात्रै सवारी सञ्चालन अनुमति दिइनेछ।

त्यस्तै रसुवाको उत्तरगया गाउँपालिका–५ खाल्टेमा आएको बाढीका कारण त्रिशुली–मैलुङ्ग–स्याफ्रुबेसी सडक खण्ड पूर्ण रूपमा अवरुद्ध भएको छ।

यसैगरी शिवपुरी गाउँपालिका–८ घट्टेखोलास्थित टोखा–छहरे सडक खण्डमा पनि रात्रिकालीन सवारी सञ्चालनमा नियन्त्रण गरिएको छ। उक्त खण्डमा राति १० बजेदेखि बिहान ५ बजेसम्म सवारी साधन चलाउन रोक लगाइएको छ।