म्याग्दी । बेनी नगरपालिका-२ खबरामा ७२ वर्षीया मनकुमारी घिमिरेको हत्या भएको घटनामा प्रहरीले उनका नातिलाई नियन्त्रणमा लिएको छ।

प्रहरीका अनुसार घिमिरेमाथि सोमबार बिहान करिब ११:३० बजे धारिलो हतियार प्रहार भएको थियो। गम्भीर चोट लागेकी उनको घटनास्थलमै मृत्यु भएको प्रारम्भिक विवरण छ।

घटनामा संलग्न रहेको आरोपमा मृतककी छोरीका छोरा २६ वर्षीय आशिष बरुवाल पक्राउ परेका हुन्। घटनापछि फरार भएका उनलाई प्रहरीले बेनी नगरपालिका-२ स्थित हाडेभिरबाट भागिरहेको अवस्थामा नियन्त्रणमा लिएको जनाएको छ।

घटनाको जानकारी प्राप्त भएपछि जिल्ला प्रहरी कार्यालय म्याग्दीबाट प्रहरी निरीक्षक सागर तिमिल्सिनाको नेतृत्वमा १५ सदस्यीय टोली परिचालन गरिएको थियो। सोही टोलीले खोजी गर्ने क्रममा बरुवाललाई फेला पारी नियन्त्रणमा लिएको हो।

प्रहरीले घटनाको कारण तथा अन्य पक्षबारे थप अनुसन्धान अघि बढाएको जनाएको छ। घटनासँग सम्बन्धित प्रमाण संकलनको कामसमेत भइरहेको प्रहरीले जनाएको छ।