काठमाडौं । काठमाडौं महानगरपालिकाले आगामी कात्तिक १३ देखि १५ गतेसम्म ‘काठमाडौं फिल्म फेस्टिबल’ आयोजना गर्ने भएको छ ।

महानगरपालिकाले शुक्रबार पत्रकार सम्मेलनको आयोजना गर्दै सो जानकारी दिएको हो । पत्रकार सम्मेलनमा बोल्दै महानगरपालिकाका प्रवक्ता नवीन मानन्धरले फिल्म फेस्टिबलमा विधागत रूपमा विभिन्न १० देशका ४० भन्दा बढी चलचित्र प्रदर्शन गरिने बताए ।

उनका अनुसार फिल्म फेस्टिभलका लागि दुई विधामा २७ वटा लघु चलचित्रसमेत छनोट भएका छन् । युथ भिडियो च्यालेन्जअन्तर्गत १२ वटा र नेपाल पानोरमाअन्तर्गत १५ वटा चलचित्र छनोट भएको प्रवक्ता मानन्धरले बताए ।

युथ भिडियो च्यालेन्जअन्तर्गत ४० वर्षसम्मका युवालाई लक्षित गरी ‘माइ कल्चर, माइ हेरिटेज’ शीर्षकमा पाँच मिनेटसम्मका भिडियो निर्माण गर्न आह्वान गरिएको थियो । यस विधामा ३५ वटा भिडियो प्राप्त भएकामा १२ वटा छनोट भएका हुन् । त्यस्तै, नेपाल पानोरमाअन्तर्गत खुला वृत्तचित्र, फिक्सन, एनिमेसन तथा प्रयोगात्मक विधाका तीन मिनेटसम्मका भिडियोमध्ये ७५ वटा प्राप्त भएकामा १५ वटा छनोट गरिएको उनले जानकारी दिए ।

उनले युथ भिडियो च्यालेन्जमा उत्कृष्ट हुने पहिलो चलचित्रलाई एक लाख ५० हजार रुपैयाँ, दोस्रोलाई एक लाख रुपैयाँ र तेस्रोलाई ५० हजार रुपैयाँ पुरस्कार प्रदान गरिने बताए ।

उनले नेपाल पानोरमा विधामा छनोट भएका चलचित्रलाई जनही एक लाख रुपैयाँ प्रोत्साहन पुरस्कार दिइने बताए । प्रवक्ता मानन्धरले फेस्टिभलमा नेपाली पुराना चलचित्र ‘कुमारी’, ‘के घर के डेरा’ र ‘सिन्दुर’ समेत प्रदर्शन गरिने बताए ।

काठमाडौंको मौलिक पहिचान, सम्पदा र रचनात्मक उद्योगको प्रवर्द्धन गर्नुका साथै स्थानीय कलाकार तथा चलचित्रकर्मीलाई अन्तर्राष्ट्रिय मञ्चसँग जोड्ने उद्देश्यले फेस्टिभल आयोजना गर्न लागिएको प्रवक्ता मानन्धरले बताए ।