लन्डन । लिग कप सेमिफाइनलको पहिलो लेगमा मिडल्सब्रसँग चेल्सी १-० गोलले पराजित भएको छ ।

मिडल्सब्रोको घरेलु मैदान रिभरसाइड स्टेडियममा भएको खेलमा चेल्सी सुरुवात देखिनै हाबी भएको थियो । कोल पाल्मरले तीन मौकाको सदुपयोग गर्न नसक्दा प्रिमियर लिग क्लब अग्रता लिन चुकेको थियो ।

३७ औं मिनेटमा च्याम्पियनसिप क्लब मिडल्सब्रले डेडलक तोड्यो । उसका लागि हेडन हेक्नीले गोल गरेका थिए । हेक्नीलाई एजाय जन्सले क्रस उपलब्ध गराएका हुन् । सबै प्रतिस्पर्धामा गरी हेक्नीको सिजनको यो केबल दोस्रो गोल हो । पहिलो हाफमा १ – ० ले पछि परेको चेल्सीले ७२ प्रतिशत बल पोजिसनमा राखेको थियो । तर पुनरागमन गर्न नसक्दा हेक्नीको गोलनै पहिलो लेगमा जित हात पार्न मिडल्सब्रोलाई निर्णायक बन्यो ।

चेल्सीलाई रोक्न घरेलु टोलीका गोलकिपरले उत्कृष्ट प्रदर्शन गरेका थिए । दोस्रो लेग जनवरी २३ मा हुनेछ । अर्को सेमिफाइनलमा लिभरपुलले फुलह्यामसँग प्रतिस्पर्धा गर्नेछ । यी दुई बीचको पहिलो लेख आज राति एनफिल्डमा नेपाली समयअुनसार पौने दुइ बजे हुनेछ । फाइनल २५ फेब्रुअरीमा वेम्बलीमा खेलाइनेछ ।