किभ । गए राति रुसले युक्रेनका कयौँ स्थानमा मिसाइल र ड्रोनहरूले आक्रमण गरेको थियो । सेप्टेम्बरयता युक्रेनमा रुसले गरेको यो सबैभन्दा ठुलो हमला भएको बताइएको छ ।

यस हमलामा रुसले फेरि युक्रेनको जेनेरेटर र प्रसारण स्टेशनहरूजस्ता ऊर्जा पूर्वाधारलाई निशाना बनाएको छ । युक्रेनको दक्षिणमा अवस्थित मिकोलेभ सहर यस आक्रमणबाट सबैभन्दा बढी प्रभावित क्षेत्रहरूमध्ये एक भएको छ । युक्रेनको आपत्कालीन सेवाका अनुसार यस आक्रमणमा दुई महिलाको मृत्यु भएको छ ।

आक्रमणमा दुई बालबालिकासहित अरू ६ जना घाइते भएको पनि बताइएको छ । आइतबार बिहान धेरै ड्रोन आक्रमण भएको मिकोलेभका गभर्नर भितालीय किमले बताएका छन् । आगलागीका कारण आवासीय भवन, अग्लो भवन, कार, सपिङ सेन्टर र अन्य पूर्वाधारमा क्षति पुगेको पनि उनले बताए । युक्रेनको राजधानी किभमा पनि क्षेप्यास्त्र र ड्रोन रोकिएको थियो । यसको टुक्रा धेरै ठाउँमा खसेको तर कोही पनि घाइते भएको खबर भने नआएको भनिएको छ ।